کابل( پژواک ٢٥ وږى ٩١) : مجتبى پتنګ د کورنيو چارو د وزير په توګه له ولسي جرګې څخه د باور رايه تر لاسه کړه.
ولسمشر حامد کرزي د وږي په ١٢مه د يوه ځانګړي فرمان له مخې ، بسم الله محمدي د ملي دفاع وزارت، مجتبي پتنګ د کورنيو چارو وزارت ، حاجي دين محمد د سرحدونو ، قومونو او قبايلو وزارت او اسدالله خالد د ملي امنيت لوى رياست ته نومولي وو.
دې کسانو نن ولسي جرګې ته خپل پلانونه وړاندې کړل او وروسته په جرګه کې ورته د رايو صندوقونو کېښودل شول .
د جرګې په نننۍ غونډه کې له حاضرو ( ٢٤١ ) وکيلانو څخه ( ١٢٩ ) تنو لوى پاسوال مجتبى پتنګ ته موافقه رايه ورکړه .
