کابل (پژواک ١٨مرغومى٩٢) : د ولسي جرګې د مخابراتو، مواصلاتو او ښارواليو کمېسيون، کابل ښاروال د ځمکو په غصب او اداري فساد تورن کړ او جرګې پرېکړه وکړه ، چې ښاروال استجواب ته وروغواړي.
د ولسي جرګې ياد شوي کمېسيون دوه اونۍ وړاندې شپږ کسيز پلاوي ته دنده ورکړه، تر څو په ناقانونه ډول د جوړو شويو لوړپوړيزه ودانيو ، سړکونو او ځينې نورو پروژو د ټيټ کيفيت په اړه د خلکو شکايتونه وڅېړي.
ياد شوي پلاوي نن خپل کاري راپور د ولسي جرګې عمومي غونډې ته وړاندې کړ .
د دې پلاوي غړي موسى خان نصرت وويل ،پلاوي غوښتل ، چې د څېړنو په موخه له ښاروالۍ څخه د مرکزي سيلو مخې ته د جوړو شويو لوړپوړيزو ودانيو، په کلوله پشته کې د يوې لوړپوړيزې ودانۍ، د قصبې سړک، د رحمان مينې د کانال ، د د همزنګ د نو اباد او پل ارتل د پلونواو ځينو نورو پروژو اسناد تر لاسه کړي.
خو هغه وويل، چې ښاروالۍ يواځې د سيلو مخې ته د ځينو ودانيو اسناد د پلاوي په واک کې ورکړل .
د ده په وينا، څېړنو وښوده ، چې خلکو د سيلو مخې ته ځمکې د پخواني ښاروال په وخت کې پر دولت پلوري دي ، خو اوسني ښاروال (محمديونس نوانديش ) په جعلي قبالو ځينو کسانو ته ورکړې دي .
دى وايي، چې د کابل ښار د تفصلي پلان له مخې، د سيلو مخې ته يوه بله سيمه د وړکتون لپاره ځانګړې شوې، خو دغه ځمکه د کابل ښاروال په لاسليک ځينو خلکو ته ورکړل شوې ، ترڅو لوړپوړيزي ودانۍ پرې جوړې کړي .
د نصرت په خبره ، کابل ښاروالۍ نه دي غوښتي ، چې په کابل کې د غيرقانوني لوړپوړيزو ودانيو د جوړدېدو مخه ونيسي .
هغه وايي : “له امنيتي چارواکو سره موخبرې وکړې ،چې ولې له ښاروالۍ سره د غيرقانوني لوړپوړيزو ودانيو د جوړېدو په مخنيوي کې مرسته نه کوي ؟ ويې ويل ، چې ښاروالۍ ورته مراجعه نه ده کړې .”
ده د نورو جزيياتو له ورکولو پرته وويل، د پلاوي څېړنې ښيي، چې په کابل ښار کې په ځينو تړونونو کې هم د ښاروالۍ له لوري اداري فساد شوى دى .
هغه زياته کړه : ” موږ هر خبره ، چې کوو په اړه يې اسناد لرو، ويډيو يې هم لرو او د خلکو سره مو خبرې کړې دي … کومې څېړنې ، چې موږ کړي ، په اړه يې بشپړ راپور لرو ، خو کابل ښاروال د نورو دوسيو د څېړلو لپاره موږ ته اجازه رانه کړه او دروازه يې پر موږ بنده کړه .”
د يادشوي پلاوي يو بل غړي صاحب خان هم وويل ، چې د کابل ښاروالۍ له لوري يو شمېر کسانو ته په جعلي قبالو ځمکې ورکړل شوې دي .
هغه پر نواندېش نيوکه کوي او وايي : ” په کابل ښاروالۍ کې يو فرعون نازل شوى ، هيڅوک حق نه لري ، چې د دې فرعون پر وړاندې حق خبره وکړي .”
د صاحب خان له دې خبرې سره په ياده جرګه کې د تخار استازي قدرت الله ذکي او يو شمېر نورو د مېزنو په ډبولو لاس پورې کړ .
قدرت الله ذکي کوم څه وويل چې خبريالانو يې غږ په مېډيا پول کې وانه ورېد، خو په ځواب کې يې د ولسي جرګې د مواصلاتو او مخابراتو کمېسيون مشر قيس حسن وويل : ” دا د بدمعاشۍ ځاى نه دى که بدمعاشي کوې بيرون ته راشه ، چې سره معلومه يې کړو .”
وروسته په ياده جرګه کې د کابل استازي عبدالقادر ځاځي هم وويل ، چې کابل ښاروال د ځمکو په غصب او اداري فساد کې لاس لري .
د هغه په وينا، کابل ښاروال بايد له دندې ګوښه او څارنوالۍ ته معرفي شي .
ده زياته کړه : “که دغه کار ونه شي موږ د ښاورالۍ مخې ته خيمه وهو او په اعتصاب لاس پورې کوو.”
تر ډېرو ناندريو وروسته د ولسي جرګې دويم مرستيال محمدصالح سلجوقي ، چې نننۍ غونډه يې ترمشرۍ لاندې جوړه شوې وه ، وويل چې کابل ښاروال به راتلونکې اونۍ د جرګې عمومي غونډې ته د استجواب لپاره وبلل شي .
د سلجوقي څرګندونې د جرګې د غړيو له لوري د شنو کارتونو په پورته کولو سره تاييد شوې .
د کابل ښاروالۍ وياند عبدالقادر ارزو پژواک اژانس سره په خبرو کې يادې شوې ټولې ادعا رد کړې او ويې ويل، چې د کابل ښاروال چمتو دى چې د ولسي جرګې د غړو ټولو پوښتنو او اندېښنو ته ځواب ووايي.
ده زياته کړه، په ولسي جرګه کې دا غږونه په داسې مهال کې رامنځ ته کېږي، چې کابل ښاروالۍ پرون د هغو لوړپوړيزو ودانيو خاوندانو ته چې له خپلو پارکېنګونو ناوړه استفاده کوي، د قانوني چلند خبردارى ورکړ.
