کابل (پژواک، ۹ لېندۍ ۹۹): مشرانو جرګې د ۱۴۰۰ هجري لمریز کال لپاره د ملي بودجې طرحه د ځینو وړاندیزونو په وړاندې کولو سره تایید کړه او ټاکل شوې چې د تصویب لپاره ولسي جرګې ته واستول شي.
حکومت د راتلونکي مالي کال بودجه چې ۴۵۲ میلیاره افغانۍ ده؛ ۲۹۵ میلیارده افغانۍ عادي او شاوخوا ۱۵۷ میلیارده افغانۍ پراختیایي بودجه ده، د لړم په ۱۸ مه مشرانو جرګې ته وړاندې کړې وه. د افغانستان مالي کال د مرغومي له لومړۍ نېټې پیلېږي.
د مشرانو جرګې د اقتصادي، مالي او بودجوي کمېسیون رییس مولوي عبدالوهاب عرفان، چې نن یې د راتلونکي مالي کال لپاره د بودجې د طرحې په اړه د جرګې غړو ته معلومات ورکول، وویل چې د بودجې مسوده د ملي لومړیتوبونو او شته امکاناتو پراساس د مالي پلان جوړولو کړنالارو او اصلاحاتو یوه کتنه چې تېرکال ترسره شوې وه، چمتو شوې ده.
هغه زیاته کړه چې د راتلونکي کال د بودجې په سند کې ۵۱۵ تر کار لاندې پروژې او پروګرامونه او ۱۸ نويو پروژو ته ځای ورکړل شوی دی.
عرفان وویل چې د بودجې په اړه د دغې جرګې د غړو نظرونه او وړاندیزونه په ۲۱ پاڼو کې ترتیب شوي، چې په هغه کې یو شمېر ملي او عام المنفعه پروژې چې حکومت د بودجې په طرحه کې نه وې ځای پر ځای کړې، په پام کې نیول شوې دي.
د مالیې وزیر عبدالهادي ارغندیوال د بودجې طرحې د وړاندې کولو پر مهال مشرانو جرګې ته ویلي و چې د راتلونکي مالي کال له ټولې (عادي او پراختیایي) بودجې، ۲۱۶ میلیارده افغانۍ له کورنیو عوایدو او د نړیوال وجهي صندوق د پور په ګډون پاتې پیسې یې له بهرنیو سرچینو تمویلېږي.
د هغه په وینا، ۷۳ سلنه عادي او لس سلنه پراختیایی بودجه له کورنیو عوایدو او پاتې نوره برخه یې د نړیوالې ټولنې له خوا تمویلیږي؛ خو که کورني عایدات سم مدیریت شي؛ تر راتلونکو څو کلونو افغانستان کولای شي خپله عادي بودجه له کورنیو عوایدو څخه تمویل کړي.
د مالیې سرپرست وزیر ویلي چې د راتلونکي کال لپاره د بودجې په طرحه کې؛ د هېواد د اوبو د سرچینو مدیریت، په ۴۳ بندونو، کانونو، په عدلي او قضایي برخو کې د کارکوونکو او د هغو په ساختماني چارو کې د ظرفیت پر لوړولو کار کول لومړيتوبونه دي، په يوه کال کې لس میلیونه وګړو ته د برېښنایي پېژندپاڼو وېش، د زیربناوو، چاپېریال، کرنې او مالدارۍ او د نورم او ستندرد لپاره د اړتیا وړ وسايل ورکړل شوي دي.
د مشرانو جرګې رییس فضل هادي مسلمیار د بودجې طرحه نن د جرګې د غړو په وړاندیزونو سره د خلکو د استازو رایې اچونې ته وړاندې کړه او د رایو په اکثریت تایید شوه.
د اساسي قانون د ۹۸ مادې له مخې، د دولت بودجه او پراختیايي پروګرامونه مشرانو جرګې او پر هغه له نظر او مشورې وروسته ولسي جرګې ته وړاندې کېږي.
تماس با ما
خبرنامه
ارسال گزارش
اپلیکیشن موبایل پژواک