معاون ریاست‌الوزراء با معاون فدراسیون بین‌المللی جمعیت‌های صلیب‌سرخ دیدار کرد

کابل (پژواک، ۲۳ جدی ۱۴۰۰): معاون ریاست‌الوزراء در دیدارش با معاون فدراسیون بین‌المللی جمعیت‌های صلیب سرخ ضمن قدردانی از فعالیت های این نهاد تأکید کرده که فعالیت‌های شان را در هماهنگی با ادارات مربوط دولتی به بیش ببرند، تا کمک‌ها به افراد مستحق برسد.

ریاست عمومی ادارۀ امور امروز در تویتی نوشته که مولوی عبدالسلام حنفی معاون ریاست‌الوزراء «امارت اسلامی» شام روز گذشته با هاویر کاستیلانوس معاون فدراسیون بین‌المللی جمعیت‌های صلیب سرخ، در ارگ دیدار کرد.

منبع نوشته است که هاویر  کاستیلانوس ضمن ارائۀ معلومات در مورد فعالیت‌های خدمات بشری نهاد مذکور، از تلاش‌های جمعیت هلال احمر افغانی، قدردانی کرده و بر ارتقای ظرفیت بهتر آنان در راستای ارائۀ خدمات بشری و کمک‌رسانی، تعهد نمود.

در این دیدار حنفی، معاون ریاست‌الوزرای «امارت اسلامی» ضمن خوش آمدید، از خدمات بشری نهاد مذکور قدردانی کرده و تأکید ورزید که فعالیت‌های ‌شان را در هماهنگی با ادارات مربوط دولتی به بیش ببرند، تا کمک‌ها به افراد مستحق برسد.