ایبک (پژواک، ۱۰ سرطان ۱۴۰۳): مسؤولین محلی سمنگان می‌گویند که مسابقات فوتسال میان تیم‌های ده ادارۀ دولتی در این ولایت با قهرمانی تیم صحت عامه پایان یافت.
ریاست شاروالی ایبک یک ماه قبل تورنمنت فوتسال را تحت نام «نظافت شهری» میان تیم‌های ده اداره در این ولایت راه‌اندازی نمود.
فخرالدین توفان، کارمند شاروالی ایبک و برگزارکنندۀ این مسابقات می‌گوید، در بازی فاینل این مسابقات دو تیم ریاست صحت عامه و شاروالی ایبک در مقابل هم قرار گرفتند.
به گفتۀ وی، تیم صحت عامه توانست تیم شاروالی را دو بر یک شکست بدهد.
وی هدف از برگزاری این مسابقات را رشد بیشتر فوتسال و شناسایی چهره‌های برتر ورزشی در میان کارمندان ادارات دولتی عنوان کرد.
در همین حال، شماری از کارمندان ادارات دولتی راه‌اندازی مسابقات فوتسال را برای رشد این رشتۀ ورزشی مهم می‌دانند.
لعل‌محمد محمدی، کارمند ریاست صحت عامه می‌گوید، برگزاری چنین مسابقات می‌تواند فرهنگ دوستی را میان ادارات بیشتر کند.
محمدی از کارمندان تمام ادارات دولتی خواست که برای مسابقات سال آینده آماده‌گی بگیرند.
قابل ذکر است، این نخستین بار است که بازی فوتسال میان ادارات دولتی در سمنگان برگزار می‌گردد.
Views: 2