تیم ملی فوتسال افغانستان امروز در برابر ایران قرار می‌گیرد

کابل (پژواک، ۱۵ عقرب ۱۴۰۴): تیم ملی فوتسال افغانستان پس از پیروزی قدرتمندانه در برابر تاجیکستان، امروز در چارچوب رقابت‌های همبستگی کشورهای اسلامی، در دومین بازی خود به مصاف تیم ملی فوتسال ایران می‌رود.

این دیدار حساس ساعت ۳:۰۰ بعد از ظهر به‌وقت افغانستان، در شهر ریاض عربستان سعودی برگزار می‌شود.

تیم ملی فوتسال افغانستان در نخستین بازی خود در این رقابت‌ها با نتیجۀ ۹ بر ۵ تیم ملی فوتسال تاجیکستان را شکست داده بود.

در ششمین دور بازی‌های همبستگی کشورهای اسلامی، هشت تیم حضور دارند؛ در گروه نخست تیم‌های عربستان سعودی (میزبان)، اوزبیکستان، لیبیا و آذربایجان باهم رقابت می‌کنند و تیم ملی فوتسال افغانستان در گروه دوم با تیم‌های ایران، مراکش و تاجیکستان هم‌گروه است.