کابلوف: روسیه و امریکا تاکنون هیچ تماس مستقیم درباره افغانستان نداشته‌اند

کابل (پژواک، ۲۴ جدی ۱۴۰۴): ضمیر کابلوف، نمایندهٔ ویژهٔ رئیس‌جمهور روسیه در امور افغانستان می‌گوید که تاکنون میان مسکو و واشنگتن در مورد افغانستان هیچگونه تماس یا گفت‌وگوی مستقیم صورت نگرفته‌است.

کابلوف در گفت‌وگو با خبرگزاری تاس گفته‌است: «هیچ تماسی برقرار نشده، به همین دلیل تاکنون هیچ گفت‌وگوی مستقیمی در این زمینه انجام نشده‌است.»

به گفتهٔ او، در سال ۲۰۲۳ نیز دو کشور در مورد افغانستان تماس‌های دوجانبه نداشتند.

وی می‌گوید که در آن‌زمان با توماس وست، نمایندهٔ ویژهٔ وقت ایالات متحدهٔ امریکا در امور افغانستان، نیز هیچ گفت‌وگویی جریان نداشت.

نمایندهٔ ویژهٔ رئیس‌جمهور روسیه خاطرنشان کرده‌است که در سال ۲۰۲۱، زمانی که توماس وست برای نخستین بار در چارچوب نشست «فارمت مسکو» به روسیه سفر کرد، وضعیت بین‌المللی به‌گونهٔ کامل متفاوت بود.

کابلوف همچنان به نشست بهار سال ۲۰۲۳ در دوحه اشاره کرده که به ابتکار آنتونیو گوترش، سرمنشی سازمان ملل متحد برگزار شده بود.

او گفته‌است که خودش و نمایندهٔ ویژهٔ چین در امور افغانستان، به سرمنشی سازمان ملل اعلام کردند که نمی‌توانند در یک تیم با کشوری همکاری کنند که پول‌های مردم افغانستان را نگه‌داشته و آن را بازنگردانده‌است.