کمیتهٔ روابط خارجی سنای امریکا طرح جلوگیری از کمک‌ها به حکومت افغانستان را تصویب کرد

کابل (پژواک، ۱۰ دلو ۱۴۰۴): کمیتهٔ روابط خارجی سنای ایالات متحدهٔ امریکا طرحی را به تصویب رسانده‌است که هدف آن جلوگیری از رسیدن کمک‌های این کشور به حکومت افغانستان می‌باشد؛ در حالی‌که سخنگوی امارت اسلامی تأکید می‌کند امریکا هیچ پولی به این حکومت ارسال نکرده و این کمک‌ها صرفاً برای نهادهای بشردوستانهٔ بین‌المللی اختصاص یافته‌است.

براساس گزارش‌ها، این طرح به‌تازه‌گی از سوی کمیتهٔ روابط خارجی سنای امریکا تصویب شده و هدف آن جلوگیری از انتقال کمک‌های مالی امریکا به امارت اسلامی افغانستان عنوان شده‌است.

جیم ریش، رئیس این کمیته گفته‌است که در جریان جنگ افغانستان بیش از دو هزار امریکایی کشته و بیش از بیست هزار تن دیگر زخمی شده‌اند. او انتقال پول مالیه‌دهنده‌گان امریکایی به افغانستان را «توهین به قربانیان جنگ افغانستان» خواندهاست.

در همین حال، ذبیح‌الله مجاهد، سخنگوی امارت اسلامی افغانستان، اعلام کرده‌است که ایالات متحده هیچ‌گونه کمک مالی به امارت اسلامی ارسال نکرده، بلکه این پول‌ها برای کمک‌رسانی به سازمان‌ها و نهادهای بشردوستانهٔ بین‌المللی به افغانستان فرستاده شده‌است.