لښکرګاه (پژواک ١٣ ليندۍ ٩٠): د هلمند ولايت مسوولينو په نادعلي ولسوالۍ کې د دوو وسله والو مخالفينو د وژلو او د ماين په چاودنه کې د درېيو ماشومانو د ټپي کېدو خبر ورکړ.
د هلمند د والي وياند داوود احمدي د ليندۍ په ١٣مه پژواک خبري اژانس ته وويل، چې تېره شپه د نادعلي ولسوالۍ د لوى مانده په سيمه کې دوو وسله والو مخالفينو غوښتل، څو په سيمه کې د سړک غاړې ماينونه خښ کړي.
د هغه په وينا، ايساف ځواکونو دغه کسان له هوا په نښه کړي وو او بيا يې پرې هوايي بريد کړى، چې دواړه په کې وژل شوي دي.
بل پلو د ګرشک ولسوالۍ د سپين جومات په سيمه کې درې ماشومان د ماين په يوه چاودنه کې ټپيان شوي دي.
سرچينه زياتوي، چې ياد ماين د وسله والو مخالفينو له خوا ځاى پرځاى شوى و او د ټپي ماشومانو عمرونه د ١٢کلونو شاوخوا دي.
احمدي وايي، چې ټپي ماشومان روغتون ته وړل شوي، خو روغتيايي حالت يې د اندېښنې وړ ښودل شوى ده.
وسله والو طالبانو تر اوسه په دې اړه څه نه دي ويلي.
د يادونې ده، چې وړمه شپه هم په نادعلي ولسوالۍ کې د يوې نښتې په ترڅ کې درې عام وګړي وژل شوي وو.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن