کابل (پژواک ٢٧ ليندۍ ٩٠): د راتلونکي ميلادي کال په پيل کې به اروپايي ټولنه له افغانستان سره د اوږدمهالو ستراتيژيکو همکاريو د سند پر متن کار پيل کړي.
په هغې خبرپاڼه کې، چې نن (د ليندۍ ٢٧ مه) د ولسمشرۍ له مطبوعاتي دفتر څخه پژواک خبري اژانس ته رالېږل شوې، راغلي، چې د افغانستان لپاره د اروپايي ټولنې استازى ويګا داس اوساکاس دغه څرګندونې په ارګ کې له ولسمشر حامد کرزي سره په کتنه کې وکړې.
اوساکاس وويل، چې له افغانستان سره به د اروپايي ټولنې د اوږدمهالې ستراتيژيکې همکارۍ په سند کې مهم ټکي د بشري حقونو رعايت، د ټاکنو د بهير اصلاح، سوداګري، د اروپايي ټولنې اقتصادي مارکېټونو ته د افغانستان لاسرسى او د ترهګرۍ او نشه يي توکو پر وړاندې مبارزه وي.
د نوموړي په وينا، اروپايي ټولنه غواړي د افغانستان په مرکز او ولايتونوې کې، په ملکي ادارو کې د اصلاحات راوستلو لپاره د افغان حکومت د لومړيتوبونو له مخې مرسته وکړي.
ولسمشر حامد کرزي په دغه کتنه کې د اروپايي ټولنې له مرستو په مننې سره وويل، دوى غواړي، چې د افغانستان ملکي اداره له سياسي لاسوهنو خوندي وي، تر څو د هېواد خلکو ته ښه خدمتونه وړاندې کړي.
د يادونې ده، چې ولسمشر کرزي څه موده وړاندې له هندوستان سره ستراتيژيک تړون لاسليک کړ او له امريکا سره د ستراتيژيک تړون پر لاسليک کولو خبرې روانې دي.
دغه راز افغان حکومت له انګلستان سره هم د ستراتيژيک تړون د لاسليک کولو لپاره هوکړې ته رسېدلى، خو په هېواد کې د عاشورا پر مراسمو د ځانمرګي بريد له امله د ولسمشر سفر هغه هېواد ته وځنډېد او تړون لاسليک نه شو.
Views: 0