غزني ښار ( پژواک ٩ غبرګولى ٩١ ) : ناپېژاندو وسلوالو د غزني په اندړو ولسوالۍ کې يو قومي مشر وواژه.
د غزني په ولايتي شورا کې د اندړو ولسوالۍ استازي امان الله کامراني د غبرګولي په ٩مه، پژواک خبري اژانس ته وويل ،چې دا پېښه پرون د ماښام له لمانځه وروسته رامنځته شوې ده.
هغه زياته کړه، چې ناپېژاندو وسلوالو د حاجي محمد په نامه دغه قومي مشر په جومات کې وژلى او بيا تښتېدلي دي.
د پېښې يو تن عيني شاهد پژواک اژانس ته وويل ، چې د ماښام له لمانځه وروسته حاجي محمد له څو نورو کسانو سره په جومات کې ناست وو، چې دوه وسلوال پر موټرسايکل راغلل پر حاجي محمد يې ډزې وکړې او تر وژلو يې وروسته ، وتښتېدل.
د ولايتي شورا ياد شوى غړى وايي، چې حاجي محمد له کومې ډلې سره تړاو نه درلود او په سيمه کې يې دخلکو ستونزې هوارولې.
هغه زياته کړه ، چې حاجي محمد دپاکستان د استخباراتي ادارې( اى اېس اى ) لخوا وژل شوى دى.
حاجي محمد پر افغانستان د شوريانو د يرغل پرمهال د حرکت انقلاب اسلامي جهادي ګوند قوماندان و.
د يادونې ده ، چې په دې وروستيو کې د هېواد په بېلابېلو سيمو کې دقومي مشرانو د وژلو پېښې زياتې شوې دي.
تېره ورځ د هلمند په سنګين ولسوالۍ کې دټولنيزې شورا غړى او قومي مشر هم د ناپېژاندو وسلوالو لخوا ووژل شو .
Views: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن