ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

يو ماشوم او نهه وسلوال طالبان ووژل شول

يو ماشوم او نهه وسلوال طالبان ووژل شول

author avatar
4 Sep 2012 - 12:34
يو ماشوم او نهه وسلوال طالبان ووژل شول
author avatar
4 Sep 2012 - 12:34

غزني ښار (پژواک ۱۴ وږى ٩١): امنيتي چارواکي وايي، چې د غزني په دوو ولسواليو کې د يو لړ عملياتو په ترڅ کې ۱۴ وسلوالو طالبانو ته مرګ ژوبله اوښتې ده.

د غزني د ملي امنيت رييس سيد اميرشاه سادات د وږي په ۱۴مه پژواک خبري اژانس ته وويل، چې د غزني په ګيرو ولسوالۍ کې د افغان او بهرنيو ځواکونو له لوري په ګډو عملياتو کې د طالب قوماندان ملا تراب د ډلې نهه کسان وژل شوي او درې ټپيان دي.

د هغه په وينا، دغه عمليات تېره ورځ د يادې ولسوالۍ د باتور، مصلي او يو شمېر نورو سيمو کې پيل شوي او لا هم روان دي.

نوموړي زياته کړه، چې د دې ترڅنګ يې د غزني په اندړو ولسوالۍ کې هم عمليات پيل کړي، چې دوه وسلوال طالبان په کې وژل شوي دي.

د سادات په خبره، په وژل شوو کې د طالبانو يو مشهور قوماندان ملا صابر، چې په حمزه يې شهرت درلود، له خپلو ساتونکي سره وژل شوى دى.

ده وويل: ((په دغو عملياتو کې زموږ ځواکونو او ملکي کسانو ته کومه مرګ ژوبله نه ده اوښتې.))

د يو بل خبر له مخې، د هاوان مرمۍ د لګېدو له امله دوو ماشومانو ته مرګ ژوبله واوښته.

د غزني د ملي امنيت رييس وايي، چې تېره شپه وسلوالو طالبانو د غزني د ګيلان ولسوالۍ پر مرکز څو د هاوان مرمۍ توغولي، چې له دې ډلې يې يوه د يادې ولسوالۍ ترڅنګ پر يوه کور لګېدلې، چې له امله يې يو ماشوم وژل شوى او يو ټپي دى.

د ملي امنيت رييس د دې پېښې مسووليت پر وسلوالو طالبانو اچوي.

وسلوالو طالبانو د يادو پېښو په اړه تر اوسه څه نه دي ويلي.

د يادونې ده، چې د غزني په اجرستان ولسوالۍ کې هم د افغان ځواکونو له لوري ځانګړي عمليات پيل شوي، چې تر اوسه په کې ٢٠ وسلوالو طالبانو ته مرګ ژوبله اوښتي.

Visits: 0

ورته موضوع

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.