ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

“نن” د کانديدانو مقدماتي نوملړ اعلانېږي

19 Oct 2013 - 05:18
19 Oct 2013 - 05:18

کابل (پژواک ٢٧ تله ٩٢): د ټاکنو د خپلواک کمېسيون چارواکي وايي، ښايي نن له غرمې وروسته د ولسمشريزو او ولايتي شوراګانو د کانديدانو مقدماتي نوملړ اعلان کړي.

د دغه کمېسيون د دارلانشاء مشر ضياء الحق امرخېل نن سهار (د تلې ٢٧مه) پژواک خبرى آژانس ته وويل، چې لا هم د دوى له خوا د کانديدانو د اسنادو ارزونه دوام لري.

امرخېل زياته کړه: “ډېر تفصيل زه نه شم درکولى، نن هم موږ پر دې موضوع باندې کار کوو، نو امکان د دې شته چې دا لېست بعد له ماسپښين څخه خپور شي.”

د ټاکنو د خپلواک کمېسيون د معلوماتو له مخې، ٢٧ تنو ولسمشريزو او تر ٣٠٠٠ ډېرو کسانو د ولايتي شوراګانو په ټاکنو کې د سيالۍ په موخه، نوم ليکنه کړې ده.

د کمېسيون له خوا د ټاکنيزو چارو د تنظيم د خپور شوي جدول له مخې ټاکل شوې نن (د تلې٢٧مه) د ولسمشرۍ او ولايتي شوراګانو د کانديدانو مقدماتي لېست خپور شي.

دا چې د کانديدانو د اسنادو تر ارزونې وروسته څومره کسان د کانديدانو له لېست څخه ايستل کېږي، د ټاکنو کمېسيون چارواکي د اوس لپاره نه غواړي په دې اړه معلومات ورکړي.

د ټاکنو کمېسيون تر دې مهاله يواځې په رسمي توګه يواځې د يوه کانديد ردول تاييد کړي دي.

دل اغا کوهدامني ولسمشرۍ ته نوماند و، خو د ټاکنو کمېسيون وياند ويلي چې ده د سل زره ملاتړو د رايې ورکولو کارتونه نه وو پوره کړي چې د ولسمشرۍ د نوماندۍ لپاره عمده شرط دى.

د کانديدانو وروستى نوملړ به نږدې يوه مياشت وروسته د لړم په ٢٥مه اعلان شي.

Hits: 0

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.