ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

د سردار نادر نعيم دويم مرستيال د غزني ولايتي شورا ته هم کانديد دى

23 Oct 2013 - 09:50
23 Oct 2013 - 09:50

کابل (پژواک، د لړم لومړۍ نېټه ٩٢): د ولسمشرۍ د کانديد سردار نادر نعيم دويم مرستيال عزيز الله پويا د غزني ولايتي شورا ته هم کانديد دى.

عزيزالله پويا چې د غزني د ولايتي شورا رييس و، تېره مياشت له دې امله استعفى ورکړه، چې د ولسمشرۍ د کانديد سردار نادر نعيم د دويم مرستيال په توګه وټاکل شو.

د ټاکنو خپلواک کمېسيون په وېبپاڼه کې داړوندو ولايتونو د ولايتي شورا ګانو په خپاره شوو لېستونو کې د غزني ولايت په نوملړ کې د عزيزالله پويا نوم هم د منارې له انتخاباتي نښې سره يو ځاى خپور شوى دى.

دا په داسې حال کې ده، چې د ټاکنو د قانون د نولسمې مادې په څلورمه فقره کې راغلي: ((هېڅ شخص نه شي کولى، په عين وخت کې له يوې ټاکنيزې حوزې په زياتو او يا له يوې ټاکنيزې څوکۍ څخه زياتو ته ځان کانديد کړي.))

د ټاکنو د خپلواک کمېسيون وياند نورمحمد نور د لړم په لومړۍ نېټه پژواک خبري اژانس ته وويل، چې دا موضوع له حقوقي پلوه څېړل کېږي او وروسته به يې په اړه اقدام وشي.

هغه زياته کړه، چې د قانون له مخې هېڅوک نه شي کولى چې په ټاکنو کې دوو څوکيو ته پر يو وخت ځان کانديد کړي.

عزيزالله پويا پژواک اژانس ته وويل، چې د ټاکنو کمېسيون ته يې د غزني ولايتي شورا ته د خپلې کانديدۍ د تېرېدو په اړه مکتوب لېږلى و، خو دا چې مکتوب ناوخته رسېدلى، په لومړني لېست کې يې نوم راغلى دى.

د نوموړي په وينا، چې د ټاکنو خپلواک کمېسيون به يې له وروستي نوملړه نوم اوباسي.

Hits: 1

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.