ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

په نیمروز کې د کمال خان بند ۱۲ ساتوونکي ووژل شول

13 Nov 2018 - 17:00
13 Nov 2018 - 17:00

زرنج (پژواک، ۲۲ لړم ۹۷): په نیمروز کې یوه امنیتي سرچینه وايي چې د دغه ولایت په چهاربُرجک ولسوالۍ کې پرکمال خان برېښنا بند د وسله والو طالبانو په برید کې د  یاد بند ۱۲ ساتوونکي وژل شوي دي.

یادې سرچينې چې د نوم له اخیستو یې ډډه کوله، پژواک خبري اژانس ته وویل چې وسله والو طالبانو تېره شپه د کمال خان برېښنا بند پر تاسیساتو پراخ برید وکړ.

د هغه په وینا، دې نښته کې د کمال خان بند ١٢ ساتوونکي پولیس وژل شوي دي.

هغه وویل چې په یاده نښته کې یو طالب هم وژل شوی دی.

پژواک هڅه وکړه څو د نیمروز ولایت امنیتي چارواکو نظر تر لاسه کړي؛ خو ځواب ورکولو ته حاضر نه شول.

په ورته مهال د نیمروز په دلارام کې د ۲۱۵ میوند قول اردو د څلورمې لوا مطبوعاتي مسوول جګړن محمد رضا رضایي وویل چې په خاشرود ولسوالۍ کې د یوې امنیتي پېښې له امله د دولت پنځه وسله وال مخالفین وژل شوي دي.

د هغه په وینا، د میوند ۲۰ په نوم دې پیل شوو عملیاتو کې تر اوسه  پنځه وسله وال طالبان وژل شوي او ۷ نور ټپیان دي.

نوموړي زیاته کړه: ((د طالبانو یو مهم قوماندان ملاسیف الله هم په وژل شوو کسانو کې شامل    دى. ))

هغه همداراز یادونه وکړه چې د عملیاتو په ترڅ کې د منار خاشرود سیمه له طالبانو پاکه شوې ده.

رضایي همداراز په ډاګه کړه چې په دې عملیاتو کې د ملي اردو ځواکونو او ملکي کسانو ته مرګ ژوبله نه ده اوښتې.

د طالبانو ویاند قاری یوسف احمدي وايی چې دوی برید د کمال خان بند څخه لرې کړی و او یاد امنیتي کسان بند پورې تړاو نه درلود.

هغه زیاته کړه: (( موږ د ټولګټو پروژو مخالف نه یو داد حکومت تش تبلیغات دي.))

احمدی وايی هیچاته اجازه نه ورکوي د کمال خان بند ته زیان ورسوي.

Hits: 0

ورته موضوع

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.