غزني ښار (پژاوک، ٢٣ لړم ٩٧): د غزني اوسېدونکي او د ولايتي شورا غړي وايي چې په دې وروستيو کې په دغه ولايت کې نا امنۍ ډېرې شوې چې له امله يې خلک سخت اندېښمن دي.
د اړوندې موضوع په اړه د غزني ښار اوسېدونکي يارمحمد د لړم په ٢٣مه پژواک خبري اژانس ته وويل چې د دغه ولايت د امنيت ټينګښت په برخه کې يواځې ژمنې شوې، عملي ګامونه نه دي پورته شوي.
د هغه د معلوماتو له مخې، په دې وروستيو کې په قره باغ، اندړو، ده يک، مُقر، اب بند، خواجه عمري او زنخان ولسواليو کې د طالبانو بريدونه له حده ډېر شوي او خلک يې سخت اندېښمن کړي دي.
ده زياته کړه: ((په دغو جګړو کې هره ورځ پوليس او د اردو سرتېري وژل کېږي، بايد غم يې وخوړل شي، بايد د امنيت ټينګښت لپاره جدي هلې ځلې وشي.))
همدارنګه د قره باغ ولسوالۍ اوسېدونکي رحمت الله پژواک ته وويل چې له تېرو څو مياشتو راهيسې دغه ولسوالۍ د وسله والو طالبانو له لوري کلابند ده.
هغه وايي: ((ولسوالۍ کلابنده ده، خو امنيتي ارګانونه يې پر وړاندې هېڅ اقدام نه کوي، د هرې ورځې په تېرېدو سره د خلکو اندېښنې ډېرېږي.))
ده وويل چې د قره باغ يواځې د ولسوالۍ مقام له حکومت سره دى، پاتې نورې برخې يې د طالبانو په کنټرول کې دي.
د نوموړي په وينا، د ولسوالۍ د بازار ټول دوکانونه او هوټلونه تړل شوي چې له امله خلک په سختو ستونزو کې دي.
دغه راز د اندړو ولسوالۍ اوسېدونکي نعمت الله پژواک ته وويل چې د نا امنۍ له امله د ولسوالۍ مرکز له ميري سيمې چهارديوال سيمې ته انتقال شوى دى.
هغه وايي: ((د ولسوالۍ پخوانى تعمير طالبانو پر ماينونو والوځاوه، اوس د ميري په بازار کې ډلې ډلې طالبان ګرځي، د خلکو په منځ کې سخته وېره خپره ده، حيران دي چې څه وکړي.))
همدارنګه د غزني ولايتي شورا مرستيال امان الله کامراني پژواک ته وويل چې دا مهال په ټولو ولسواليو کې جګړې روانې دي.
هغه وايي: ((درې ولسوالۍ امن وې چې اوس هلته هم جګړې روانې دي، نو هېڅ ځاى بې جګړې نه دى.))
کامراني وايي چې څو ځلې دوى له حکومتي مشرانو د دغه ولايت د امنيت د ټينګښت غوښتنه کړې خو تر اوسه يواځې ژمنې شوې دي.
د يادو څرګندونو په اړه د غزني والي وحيدالله کليمزي وويل چې له تېرو درېيو کلونو راهيسې په دغه ولايت کې امنيتي ستونزې ورځ تر بلې ډېريږي.
هغه وايي: ((د غزني د مساحت پراخوالى او د امنيتي سرتېرو په تشکيل کې کموالى د دې لامل شوی چې نا امنۍ ډېرې شي.))
د والي په خبره چې په دې وروستيو کې شاوخوا درې سوه سرتېري دغه ولايت ته ورغلي چې ډېر ژر به ورسره په امنيتي برخه کې مثبت بدلون راشي.
دغه راز د غزني امنيه قوماندان مل پاسوال غلام داوود تره خېل وويل چې د يو شمېر ولسواليو د نيولو په موخه به پراخ عمليات پيل شي.
هغه خلکو ته د امنيت د ټينګښت ډاډ ورکړ او ويې ويل: ((غزني نه مخکې سقوط کړى و او نه به هم سقوط وکړي.))
د يادونې ده، د زنخان، ده یک، اندړو، واغظ، خوږیاڼي، خواجه عمري، جغتو، رشیدان، اجرستان او ګیرو ولسواليو مرکزونه د نا امنۍ له امله د غزني ښار شاوخوا سيمو ته انتقال شوي دي.
Views: 0