کابل-مزارشريف (پژواک، ٩ سلواغه ٩٨): په کابل او بلخ ولايتونو کې مدني فعالانو، قومي مشرانو او ښځو د پاکستان د پوليسو له لوري د منظور پښتين له نيول کېدو سره مخالفت وکړ او ژر تر ژره يې د هغه د خوشي کولو غوښتنه وکړه.
د پاکستان پوليسو د سلواغې په شپږمه نېټه د پښتون ژغورنې غورځنګ مشر منظور پښتین د پېښور ښار اړوند د تاکال په سيمه کې له يو شمېر نورو ملګرو سره نيولى دى.
د ولسمشر غني په ګډون زرګونو افغانان د منظور پښتين له نيول کېدو سره کلک مخالفت کړی او د بېلابېلو ولايتونو اوسېدونکو د لاريونونو په ترڅ کې د پښتين د خوشي کېدو غوښتنه کړې ده.
په همدې لړ کې نن په کابل کې د ښځو د واک خوځښت لسګونو غړو هم لاريون وکړ او د منظور پښتين د ژر تر ژره خوشي کېدو غوښتنه يې وکړه.
د دوې له ډلې ماریا توتاخېل پژواک ته وويل چې منظور پښتین د انسانیت او سولې لاروى دی، بايد ژر تر ژره را خوشی شي.
توتاخېل وویل، پاکستان دې د منظور پښتین پر ځای په دغه هېواد کې د ترهګرو ځالې له منځه یوسي او پر پښتنو دې نور ظالم نه کوي.
همدارنګه د پکتیا د ځوانانو پارلمان استازې نادیه حکیمي منګل وویل چې دوی یوازې د منظور پښتین پر راخوشي کولو بسنه نه کوي، پاکستان بايد د دې ناوړې او ظالمانه کړنې ځواب ورکړي.
منګل زیاتوي، پاکستان ځکه منظور پښتین بندي کړ، که چېرې پښتانه سره یوځاى شي نو د دوی ظلم به پای ومومي.
د دغه لاريون يو شمېر نورو ګډونوالو هم ورته څرګندونې وکړې او له نړيوالۍ ټولنې يې غوښتنه وکړه چې د منظور پښتين په خوشي کولو خپل رول ولوبوي.
د دوى په وينا، که چېرې د پاکستان حکومت پښتين را خوشی نه کړي، دوى به خپلو لاريونونو ته دوام ورکړي.
دغه راز د يو بل خبر له مخې، د بلخ ولايت په مرکز مزارشريف ښار کې لسګونه مدني فعالانو او قومي مشرانو د پښتون ژغورنې غورځنګ په ملاتړ او د پاکستان پر خلاف اعتراض وکړ.
اعتراض کوونکو غوښتنه کوله چې پاکستان بايد له کوم قيد او شرط پرته منظور پښتون بېرته راخوشی کړي.
دغه معترضين د سلواغې په ۹مه د بلخ ولايتي شورا مخې ته راټول شوي وو او د لر او بر يو افغان شعارونه يې ورکول.
په بلخ ولايت کې د مدني او ټولنيزو چارو فعال سيرت نوري پژواک ته وويل چې د بشري او انساني حقونو د تامين په موخه دوی د پښتون ژغورنې غورځنګ په ملاتړ راټول شوي دي.
هغه زياته کړه چې منظور پښتين اوس له قومي دايرو راوتلی او د نړۍ په هر ګوټ کې چې ظلم او بې عدالتي وي، بايد پر وړاندې يې مبارزه وشي.
د هغه په وينا، پاکستان تل د بشري حقونو د فعالانو پر وړاندې خصمانه کړنې ترسره کړې دي.
د مزارشريف اوسېدونکې ملالۍ افغان هم ياد لاريون ته په خپلو خبرو کې وويل چې له پښتون ژغورنې غورځنګ څخه ملاتړ د هر افغان حق او مسووليت دی.
هغې زياته کړه چې پې ټي اېم د ټولې سيمې لپاره د سولې او امن فضا رامنځته کېدو په لټه کې دی.
نوموړې په خپلو خبرو کې دا هم وويل چې د منظور په نيولو سره به د حق غوښتنې دغه اواز چوپ نه شي بلکې په وينا يې چې لا به د خلکو شور او عدالت غوښتنې نارې اوچتې شي.
همدارنګه د بلخ د ولايتي شورا غړي عبدالوکيل له ملګرو ملتونو او د بښنې له نړيوال سازمان څخه غوښتنه وکړه چې د پښتون ژغورنې غورځنګ په ملاتړ غږ پورته کړي.
د ولايتي شورا دغه غړي همدا راز له پاکستانه وغوښتل چې افغانستان کې دې خپله لاسوهنه بنده کړي.
د دغه لاريون په پای کې پنځه ماده ييز پرېکړه ليک هم خپور شو چې په کې پر نړيوالې ټولنې غږ شوی وو؛ څو د پاکستان د ناقانونه کړنو مخه ونيسي.
د پرېکړه ليک په يوه برخه کې راغلي وو: ((موږ د بلخ ولس له پښتون ژغورنې غورځنګ څخه غواړو چې خپلو هڅو ته دوام ورکړي، موږ افغانان به په ټوله معنى د هغوی په ملاتړ ولاړ يو.))
د يادونې ده، د بښنې نړيوال سازمان هم د پاکستان دغه ګام غندلی او د منظور پښتين د ژر تر ژره خوشې کېدو غوښتنه يې کړې ده.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن