کابل (پژواک، ۱۲وږی ۹۹): پوهنې وزارت، د اسلامې زده کړو د روزنې مرکزونو لپاره د ۲.۲ ميليونو کتابونو د وېش لړۍ پيل کړه.
له ياد وزارت څخه د وږي په ۱۲مه پژواک خبري اژانس ته په يوه رالېږل شوې خبرپاڼه کې راغلي چې د اسلامي زده کړې برنامې د ۲.۲ ميليونه کتابونو د وېش پروسه په رسمي ډول د هېواد په کچه د اسلامي زده کړې د روزنې مرکزونو لپاره نن پيل شوه.
د پوهنې وزارت سرپرستې رنګينې حميدې د اسلامي زده کړې مرکزونو لپاره د نويو درسي کتابونو د وېش د پروسې پيل يو تاريخي ګام وباله .
هغې زياته کړه: ((د دې کتابونو چاپ چې څه باندې ۲۰۰ ميليونه افغانۍ لګښت پرې راځي، د پوهنې وزارت د اختياري بوديجې له خوا ورکړل شوى.))
مېرمن حميدې ويلی، د دې لپاره چې په هېواد کې د اوسني چاپ خونو ظرفيت پياوړی شي، د دې کتابونو د چاپ مسووليت داخلي چاپ خونو ته وسپارل شو.
دې ژمنه وکړه چې د پوهنې وزارت به ددې وزارت په چوکاټ کې د اسلامي زده کړو د برنامه بشپړ ملاتړ وکړي.
د حج او اوقافو وزارت د مسلکي چارو مرستيال ډاکټر امين الدين مظفري ښاريانو ته د اسلامي تعليماتو د نويو درسي کتابونو د پوهاوي په برخه کې ډاډ ورکړ.
د پوهنې وزارت د اسلامي تعليماتو د معينيت سرپرست، محمد عارف ملکيار د کتاب په خپرولو کې د پوهنې وزارت د مشرتابه له پاملرنې څخه مننه وکړه او زياته يې کړه، د اسلامي زده کړو نوی نصاب د وړتيا ميتود سره چمتو شوی او د اسلامي زده کړو برنامې د ښوونکو لپاره د نوي نصاب څرنګوالي په اړه به د ښوونې او روزنې پروګرامونه پيل شي.
عصمت خاورين
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن