Pajhwok Afghan News

طالبان په بلخ ولايت کې له لسو زرو کورنيو د برېښنا عوايد ټولوي

مزارشريف ( پژواک، ۵لړم ۹۹) : د بلخ ولايت چارواکي تاييدوي، چې دغه ولايت کې له لسو زرو کورنيو څخه وسله وال طالبان د برېښنا د بېلونوعوايد ټولوي.

دغه څرګندونې د بلخ د برېښنا رييس انجنير حميدالله حميدي د لړم په ۵مه، مزارشريف کې د برېښنا د دوو جکشنونو د پرانيستې په مراسمو کې وکړې.

د حميدي په خبره، د برېښنا دغه دوه جکشنونه د ۲،۳ ميليونه يورو په ارزښت جوړ شوي، چې په جون مياشت کې يې چارې بشپړې شوې وې او اوس يې په رسمي ډول پرانيستل.

د هغه په وينا، د يادو جکشنونو په جوړېدو سره د مزار ښار په مرکزي برخو کې به د برېښنا مزي د ځمکې له لارې وغځول شي؛ چې په دې ډول به د برېښنا د ضايعاتو مخه هم ونيول شي.

نوموړي له خلکو څخه په دې برخه کې د همکارۍ غوښتنه وکړه.

په ورته مهال د بلخ د برېښنا رييس تاييدوي، چې دغه ولايت کې د برېښنا له لسو زرو مشترکينو څخه طالبان عوايد ټولوي.

د هغه په وينا، طالبان په هغو سيمو کې د برېښنا د بېلونو لګښتونه ټولوي، چې د يادې ډلې تر نفوذ لاندې وي.

نوموړي زياته کړه : (( د بلخ ولسوالۍ ځينې برخې او د نهرشاهي ولسوالۍ په سياګرد سيمه کې طالبان له شاوخوا لسو زرو مشترکينو څخه عوايد ټولوي، په يادو سيمو کې د هغوی حضور شته نو ځکه زموږ کارمندان نه شي ورتلای)).

د بلخ د برېښنا رييس همدا راز وويل، چې د برېښنا له درکه په هرو دوو مياشتو کې طالبانو ته شاوخوا پنځه ميليونه افغانۍ عوايد ورځي.

له دې سره د بلخ والي محمد فرهاد عظيمي هم تاييدوي، چې د دغه ولايت په يو شمېر سيمو کې د طالبانو له خوا د برېښنا د عوايدو ټولولو راپور ور رسېدلی دی.

هغه پژواک ته وويل، چې امنيتي مسوولينو ته به سپارښتنه وکړي؛ څو ژر تر ژره هغه سيمې تصفيه کړي، چې طالبان پرې نفوذ لري او دولتي عوايد په کې ټولوي.

د عظيمي په خبره، ولايت مقام د برېښنا شرکت له ټولو هغو پلانونو څخه ملاتړ او هر کلی کوي، چې له مخې يې مشتريانو ته خدماتي اسانتيا رامنځته کېږي.

نوموړي همدا راز د برېښنا شرکت له هغې پرېکړې څخه هم هرکلی وکړ، چې له مخې يې د برېښنا تعرفې په ټول هېواد کې مساوي کېږي.

د بلخ د ولايتي شورا رييس هم په مزارشريف کې د برېښنا د دوو جکشنونو د چارو بشپړېدل د خلکو لپاره ښه زېری بولي.

هغه د بلخ له برېښنا شرکت څخه وغوښتل، څو تر ځمکې لاندې د برېښنا مزو له تېرولو وروسته د برېښنا اضافي پايې او لينونو په واسطه ولسواليو ته برېښنا ولېږدوي.

نوموړي همدا راز د افغانستان برېښنا پر شرکت نيوکه وکړه، چې د برېښنا د تعرفې مساوي کېدو برخه کې د بلخ د خلکو غوښتنې نه اوري.

حديد وويل: (( دوه کاله کېږي، چې د بلخ خلک د برېښنا د نا انډوله وېش په تړاو اعتراضونه لري؛ خو هېڅوک يې غږ نه اوري، موږ يو ځل بيا برېښنا شرکت ته ګوت څنډنه کوو چې لطفا دې نوره دا شته بې عدالتي پای ته ورسوي)).

د حديد په وينا، حکومت مکلف دی؛ څو ټولو افغانانو ته يو شان خدمات وړاندې کړي.

د بلخ برېښنا شرکت که څه هم کره شمېرې نه په ډاګه کوي؛ خو تاييدوي چې دغه ولايت کې لا هم لسګونه کسان شته، چې ميليونونه افغانۍ د برېښنا له درکه پوروړي دي.

Views: 0

Exit mobile version