ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

د افغان ښځو ملګرو سفيرانو د سولې بهير کې د لاسته راوړنو په خونديتوب ټينګار وکړ

31 Oct 2020 - 11:00
31 Oct 2020 - 11:00

کابل (پژواک، ١٠ لړم ٩٩) : د افغان ښځو د ملګرو سفیرانو ډلې د سولې بهیر کې د افغان ښځو پر معنا داره ګډون د ملاتړ ترڅنګ د هغوی د لاسته راوړنو پر خوندیتوب هم ټينګار کړی دی.

دا په داسې حال کې ده، چې نن د ملګرو ملتونو د امنیت شورا د ۱۳۲۵ نمبر پرېکړه لیک ۲۰مه کالیزه نمانځل کيږي.

په کابل کې د ملګرو ملتونو یوناما دفتر نن د لړم په ١٠مه، په دې مناسبت په خپلې يوې خبرپاڼې کې ویلي چې افغان مېرمنو د ټولنې د یووالي، د شخړو مخنیوي او سولې رامنځته کولو کې مهم رول لوبولی دی.

د ملګرو ملتونو سیاسي استازوالۍ په خبرپاڼه کې د تلپاتې سولې ټینګښت لپاره د سولې خبرو کې د مېرمنو پر ګډون ټينګار کړی دی.

د یوناما په خبرپاڼه کې راغلي:”د افغان ښځو د ملګرو سفیرانو ډله د سولې بهیر په هره برخه کې د افغان ښځو د مانا لرونکي او فعال ګډون د ترلاسه کولو او همدارنګه د سولې په بهیر کې د ښځو د حقونو د خوندیتوب په ډاډمنېدو کې د هغوی د ښکیلتیا ملاتړ کوي.”

په خبرپاڼه کې ویل شوي چې د سولې خبروکې باید د افغان مېرمنو اقتصادي، ټولنیزې او سیاسي لاسته راوړنې وساتل شي.

یوناما زیاته کړې:”ښځو د سولې د بهیر ټولو اړخونو ته له خبرو اترو نیولې د سولې ترعملي کېدو پورې ځانکړی او مهم لید لوری ورکړی چې د سیاسي، اقتصادي او ټولنیزو مسلو بشپړ استازیتوب کوي او د ټولو افغانانو لپاره مهم دي.”

اوس مهال له طالبانو سره د افغانستان دولت مذاکراټي ډله کې څلور تنې ښځې هم شاملې دي.

په افغانستان کې د ملګرو ملتونو مرستندویه ماموریت یا «یوناما» د ښځو حقوقو خوندیتوب ته په اشاره یو ځل بیا په افغانستان کې د ښکېلو اړخونو ترمنځ د ژر تر ژره تاوتریخوالي کمولو غږ کړی دی.

یوناما زیاتوي چې روان تاوتریخوالي پر افغان مېرمنو او ماشومانو تر ټولو زیات منفي اغېز کړی دی.

سرچينې زياته کړې، چې ټول اړخونه باید د سولې ټینګښت لپاره له رامنځته شوي تاریخي فرصت څخه ګټه پورته کړي.

په راپور کې ویل شوي چې د ۲۰۲۰ کال د جنورۍ او سپټمبر ترمنځ د هرو لسو ملکي تلفاتو له ډلې یې څه باندې څلور تنه ماشومان او ښځې دي.

د یوناما په خبرپاڼه کې راغلي: “د همدې لپاره موږ دجګړې په ټولو ښکېلو اړخونو یوځل بیا غږ کوو چې د جنسیت پر اساس تاوتریخوالي په ګډون په بېړني ډول تاوتریخوالی راکم کړي او د یو سوله ییز، په ځان بسیا او باثباته افغانستان لپاره کار وکړي.”

د افغان ښځو د ملګرو سفیرانو په ډله کې په کابل کې د استرالیا، ډنمارک، د اغاخان پرمختیايي شبکه، کاناډا، هالنډ، داسلامي همکاریو سازمان، ترکیې، د انګلستان شاهي هېواد، متحده ایالاتو او د ملګرو ملتونو استازولیو مشران شامل دي.

پر همدې مهال د جمهوري ریاست ویاند صدیق صدیقي پر خپل ټویټر لیکلي چې افغان مېرنو په ټولو برخو کې اغېزمن رول تر سره کړی چې په وینا یې افغان حکومت بیا هم د دوی له رول څخه ملاتړ کوي.

Hits: 5

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.