کندهار ښار (پژواک، ٥ غويى ١٤٠٠): د کندهار پنجوايي ولسوالۍ د يخ څاه په سیمه کې د ملي اردو پر ځواکونو د هاموې موټر په وسیله برید شوی دی.
د پنجوايي ولسوالۍ يوې امنیتي سرچینې د غويي په ٥مه پژواک خبري اژانس ته وویل، دغه برید تېره شپه شاوخوا يوه بجه شوی دی.
سرچینه زیاتوي، وسله والو چاودېدونکي توکي په یوه هاموې موټر کې ځای پر ځای کړي وو او د برید موخه یې د پولیسو او ملي اردو د ضربتي ځواکونو ګډه قرارګاه وه.
د سرچینې په وینا، په دغه برید کې يواځې دوه سرتېري ټپيان شوي دي.
چاودنه دومره زوروره وه چې غږ یې په کندهار ښار کې هم واورېدل شو.
وسله والو طالبانو تر اوسه په دې اړه څه نه دي ویلي.
د ارغنداب له تصفیه کولو وروسته اوسمهال په پنجوايي ولسوالۍ کې د امنیتي ځواکونو عملیات روان دي.
چارواکي وايي، د ارغنداب په څېر به پنجوايي ولسوالۍ هم ژر له وسله والو پاکه شي.
Views: 76