Pajhwok Afghan News

« تر هغه چې د سرپرستۍ فرهنګ ختم نه شي، امنیت او عدالت نه شي ټینګېدای»

کابل (پژواک،۲۰ چنګاښ ۱۴۰۰): د ولسي جرګې یو شمېر غړي د پرست وزیرانو د کار دوام په هېواد کې د بې ثباتۍ لامل ګڼي او د جرګې منشي وايي چې که حکومت نوماند وزیران معرفي نه کړي دغه جرګه به په دې اړه تصمیم ونیسي.

اوس مهال پوهنې، اطلاعات او فرهنګ، د کلیو او پراختیا، ښځو چارو، مالیې، عامې روغتیا، ملي دفاع او کورنیو چارو وزارتونو، لویې څارنوالۍ، افغان سرې میاشتې، مرکزي بانک او د سترې محکمې د رهبرۍ عالي شورا د سرپرستانو له خوا اداره کېږي.

د پوهنې، ښځو چارو، اطلاعات او فرهنګ، کلیو او پراختیا وزارتونه او مرکزي بانک د هغو سرپرستانو له خوا اداره کېږي چې ولسي جرګې یې نوماندي رد کړې ده.

ولسي جرګې څو ځله د سرپرستانو د کار دوام ناقانونه بللی او حکومت دې جرګې ته د باور رایې ورکولو په خاطر د نوماند وزیرانو د معرفي کېدو خبره کړې خو تر اوسه یې دغه کار نه دی کړی.

په ولسي جرګه کې د کندهار د خلکو استازې ملالۍ اسحاق زۍ وویل، په ادارو په ځانګړې توګه امنیتي ادارو کې د سرپرستانو حضور د ناامنۍ د ډېرېدو لامل شوی، تر څو چې د سرپرستۍ فرهنګ پای ته ونه رسېږي، کار اهل کار ته ونه سپارل شي، امنیت او عدالت نه شي ټینګېدلای.

هغه زیاته کړه چې سرپرستان ځواب ورکوونکي نه دي او د خپلو شخصي ګټو په هڅه کې دي.

په ولسي جرګه کې د نیمروز د خلکو استازي ګل احمد نورزاده وویل: ((د سرپرستانو د کار دوام د بې ثباتۍ، ناامنۍ ډېرېدو او د حکومتي چارواکو له خوا د قانون ماتولو لامل شوی، نه یوازې داچې یو شمېر وزارتونه د سرپرستانو له خوا د قانون خلاف اداره کېږي، ان ځینې رد شوي نوماندان له میاشتو راهیسې د سرپرست په توګه د ولسمشر له خوا ساتل شوي دي.))

د ولسي جرګې منشي محمد کریم اتل هم حکومت دې جرګې ته د باور رایې اخیستو لپاره د نوماند وزیرانو د نه معرفي کېدو په برخه کې له قانونه په سرغړونه تورن کړ او ویې ویل: ((ترڅو چې د خلکو غوښتنې په پام کې ونه نیول شي او قانون د چارواکو له خوا په یو ډول تطبیق نه شي په دولتي ادارو کې به پرمختګ ونه شي او ګډوډي به دوام ولري.))

هغه زیاته کړه: ((که د حکومت دغه ډول چلند دوام وکړي، ولسي جرګه به د سرپرستانو په اړه تصمیم ونیسي.))

دا په داسې حال کې ده چې د ولسي جرګې رییس د روان کال په غويي میاشت کې ویلي و چې د دې جرګې د رییسانو کمېټې د پرېکړې له مخې، دغه جرګه به د غبرګولي په پنځمه په ادارو کې د سرپرستۍ فرهنګ د پای ته رسېدو په تړاو تصمیم ونیسي.

په ورته وخت کې یوې حکومتي سرچینې چې نه یې غوښتل نوم یې خپور شي پژواک ته وویل، په نږدې راتلونکي کې نوماند وزیران د باور رایې اخیستو لپاره ولسي جرګې ته معرفي کېږي.

دا په داسې حال کې ده چې ټاکل شوې ولسي جرګه سبا د روان کال په ناستو کې وروستۍ عمومي ناسته ترسره کړي او د زمري په لومړۍ د اوړي یو نیم میاشتنۍ رخصتي پیل کړي.

Views: 11

Exit mobile version