کابل (پژواک، ۲۶ زمری ۱۴۰۰): د طالبانو د تحریک مرستیال او دقطر د سیاسي دفتر مشر ملا عبدالغني برادر له اته کسیز پلاوي سره کندهار ته رسیدلی دی.
د طالبانو د قطر دفتر ویاند ډاکټر محمد نعیم د زمري په ۲۶مه، په ټویټر کې ولیکل چې ملا برادر نن له غرمې وروسته له قطر څخه د کندهار په لوري روان شو.
هغه زیاته کړې چې نوموړی مازیګر ناوخته کندهار ته ورسید چې د سلګونو کسانو لخوا یې تود هرکلی وشو.
بلخوا طالبانو ته نږدې سرچینې وایي چې ملا برادر به شپه په کندهار کې کوي او ټاکل شوې چې سبا د کابل په لوري روان شي.
د کابل تر نیولو وروسته دا دطالبانو د لوړ پوړو مشرانو لومړۍ ډله ده چې افغانستان ته رسیږي.
تر دې مخکې دطالبانو ویاند ذبیح الله مجاهد له شلو کلونو وروسته د لومړي ځل لپاره د رسنیو پر وړاندې راښکاره او د کابل د حکومت درسنیو په مرکز کی یې خبري غونډې ته وینا وکړه.
هغه وویل چې د ټولو سیاسیونو سره تر تفاهم وروسته به یوه ټولشموله اسلامي حکومت جوړوي.
Visits: 218
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن