کابل (پژواک، ۱۶ لېندۍ ۱۴۰۰): د افغانۍ پر وړاندې د امریکایي ډالرو ارزښت په بې ساري ډول لوړ شوی، اوس مهال د کابل ښار په شهزاده سرای کې یو امریکايي ډالر په څه باندې ۱۰۰ افغانۍ بدلېږي.
د کابل د شهزاده سرای مرستیال حاجي دادګل پژواک خبري اژانس ته وویل چې نن یو امریکايي ډالر په ۱۰۱،۷۰ افغانۍ تبادله کېده.
هغه د افغانیو پر وړاندې د ډالر د ارزښت لوړېدو لامل په بازار کې د ډالرو کموالی یاد کړ.
په ورته وخت کې د افغانستان بانک ویلي چې یاد بانک د مدیریت شوې متحولې تبادلې له بیې پیروي کوي، په داسې رژیم کې د تبادلې د بیې تغییرات حتمي دي.
سرچینه زیاتوي چې په دې وروستیو کې د ډالر بیه نه یوازې د افغانۍ، بلکې د ټولو اسعارو پر وړاندې لوړه شوې ده.
د افغانستان بانک وایي:«د ډالر د بیې لوړېدو بل لامل داخلي موضوع ده، بازار ته زموږ د هېوادوالو مراجعه د ډالرو لاسته راوړل دي.»
د افغانستان بانک ژمن دی چې له شته امکاناتو په استفاده، تر یوې اندازې د بازار اړتیاوې پوره کړي.
دا بانک له خلکو غواړي چې اندېښنه دې نه لري ، د افغانیو د ملاتړ او ثبات لپاره دې د معاملاتو او راکړې ورکړې پر مهال له خپلو ملي پیسو استفاده وکړي.
سرچینه لیکي، د شته امکاناتو په درلودو سره یې تل هڅه کړې څو تر یوې اندازې د بیو د ښکته او پورته کېدو چې له امله یې خلک زیانمن کیږي مخه ونیسي.
Views: 29