کابل (پژواک، ۱۲ وږی ۱۴۰۱): د اسیا جام دویم پړاو سیالیو په لومړۍ لوبه کې سریلانکا افغانستان ته د څلورو ویکټو په توپېر سره ماتې ورکړه.
د دې لوبې پچه سریلانکا وګټله او افغانستان ته یې د توپوهنې بلنه ورکړه چې په شل اورونو کې افغان کرکټ ملي لوبډلې د پنځو لوبغاړو په سوځېدو سره ۱۷۵ منډې جوړې کړې او مقابل لوري ته یې د ۱۷۶ منډو هدف وټاکه.
د افغانستان له لوري رحمنالله ګربز په نننۍ لوبه کې ښه وځلېد او ۸۴ منډې یې جوړې کړې، ابراهیم ځدراڼ بیا ۴۰ منډې جوړې کړې.
د سریلانکا لوبډلې یاد هدف په شلم اور کې د شپږو لوبغاړو په سوځېدو سره پوره کړ او افغانستان ته یې د څلورو ویکټو په توپیر سره ماتې ورکړه.
په توپ اچونه کې د افغانستان له لوري مجیب او نوینالحق دوه دوه، محمدنبی او راشد خان بیا د سریلانکا یو یو لوبغاړي وسوځول.
د یادونې ده، د اسیا جام سیالیو دویم پړاو لوبو کې به افغان کرکټ ملي لوبډله د روانې سپټمبر میاشتې په ۷مه له پاکستان سره لوبه وکړي.
Views: 51