ایبک، فراه (پژواک، ۱۵ لړم ۱۴۰۱): مسوولین وايي نن په سمنګان کې له ۱۳۸۶ اړو کورنیو سره د خوراکي توکو، اصلاح شوي تخم او کیمیاوي سرې مرسته شوه او په فراه کې ۳۱ کورنیو ته نغدې پېسې ورکړل شوې.
د سمنګان ولايت د طبيعي پېښو پر وړاندې د چمتووالي امر مولوي ولي محمد ستانکزى وايي، دغه توکي د طبيعي پېښو پر وړاندې د چمتووالي وزارت له خوا چمتو شوي چې ۵۵۰ بېوزله کورنیو ته پنځه قلمه خوراکي توکي ووېشل شول.
هغه د جزئیاتو له ورکولو پرته وویل، په دغو توکو کې وریجې، غنم، بسکوېټ، مربا او د حبوباتو کنسر شامل دي.
دغهراز د سمنګان په مرکز او حضرت سلطان ولسوالۍ کې ۸۳۶ بزګرانو ته د غنمو اصلاح شوي تخمونه، کیمیاوي سره او د کورني باغچو وسایل ووېشل شول.
د سمنګان د کرنې او مالدارۍ ریاست د کرنیزو چارو امر محمدعمان حنفي وایي، د غنمو د اصلاح شوي تخم، کیمیاوي سرې او کورني باغچو د وسایلو ټولیز ارزښت ۱،۸ میلیونه افغانۍ کېږي چې د افغان اېډ موسسې له خوا ورکړل شوي دي.
دغهراز د فراه د اطلاعاتو او فرهنګ ریاست وايي، نن د دغه ولایت په بالابلوک ولسوالۍ کې له ۳۱ هغو کورنیو سره چې کورونه يې په تېرو جګړو کې وران او یا تخریب شوي، د نغدو پیسو مرسته وشوه.
یاد ریاست پژواک ته په رالېږلې خبرپاڼه کې ویلي چې دغه مرسته د «افغان کاروبار» موسسې له خوا شوې او هرې کورنۍ ته ۳۲ زره ۴۵۰ نغدې افغانۍ ورکړل شوې دي.
Views: 19