اټلانټا (پژواک، ۷ سلواغه ۱۴۰۱): د پاکستان پخواني لومړي وزیر عمران خان ادعا کړې چې د دغه هېواد پخواني ولسمشر اصف علي زرداري د ده د وژلو لپاره ترهګرو ته پیسې ورکړې دي.
پاکستاني رسنیو د سلواغې په ۷مه خبر ورکړی چې د عمران خان دا څرګندونې تازه په خپله ټویټرپاڼه کې کړې دي.
له دې مخکې عمران خان ویلي وو چې څلورو کسانو د ده د وژلو پلان جوړ کړی، خو د چا نوم یې نه و په ډاګه کړی.
هغه اوس ویلي چې په دې څلورو کسانو کې یې یو پخوانی ولسمشر او د پیپل ګوند مشر اصف علي زرداري دی.
نوموړي ادعا کړې چې زرداري د دغه کار لپاره ترهګرو ډلو ته پیسې ورکړې دي او د پاکستان ځیني ځواکمن خلک ورسره په دغه کار کې مرسته کوي.
عمران خان د (ځواکمنو خلکو) اصطلاح د پاکستان د پوځ ځینو چارواکو ته کاروي.
بلخوا د پیپل ګوند د عمران خان دغه تورونه رد کړي او د هغه پر ضد یې په محکمه کې د عریضې کولو اعلان کړی دی.
Views: 109