ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

د کابل پوهنتون ماسټرۍ پروګرامونو لپاره له ۳۰۰۰ کسانو ازموینه واخیستل شوه

د کابل پوهنتون ماسټرۍ پروګرامونو لپاره له ۳۰۰۰ کسانو ازموینه واخیستل شوه

author avatar
26 May 2023 - 12:19
د کابل پوهنتون ماسټرۍ پروګرامونو لپاره له ۳۰۰۰ کسانو ازموینه واخیستل شوه
author avatar
26 May 2023 - 12:19

کابل (پژواک، ۵ غبرګولی ۱۴۰۲): د ازموینو ملي ادارې له لوري د کابل پوهنتون د ماسټرۍ ۱۵ پروګرامونو ته له درې زرو کسانو ازموینه واخیستل شوه چې ۴۵۰ کسان به يې جذب کړاى شي.

یاده ازموینه نن د غبرګولي په ۵مه، د کابل پوهنتون په مرکزي کتابتون کې د ازموینو ملي ادارې له لوري واخیستل شوه.

په دې اړه جوړو شوو مراسمو ته د کابل پوهنتون د علمي چارو مرستیال محمداشرف غیرت وویل چې دغه پوهنتون په لسو پوهنځیو کې د ماسټرۍ ۱۵ پروګرامونه لري او نن له شاوخوا درې زره کسانو څخه ورته ازموینه واخیستل شوه.

هغه وایي، د دغه درې زره کسانو له ډلې به هر پوهنځي ته ۳۰ کسان -چې په ټوله کې ۴۵۰ تنه کېږي- جذب کړاى شي.

په یادو مراسمو کې د کابل پوهنتون رییس دوکتور اسامه عزیز وویل، په نږدې څو میاشتو کې به په دغه پوهنتون کې د ماسټرۍ څلورو نورو پروګرامونو لپاره هم ازموینه واخیستل شي.

نوموړی وایي، دغه څلور نوي پروګرامونه د کابل پوهنتون ژورنالیزم پوهنځي کې د ټولیزو اړیکو، د ټولنیزو علومو پوهنځي کې د افغانستان پېژندنې، د کرنې پوهنځي کې د هارټیکلچر او د فارمسي پوهنځي کې د فارمسي علومو د ماسټرۍ پروګرامونه دي.

بل لورته د ماسټرۍ پروګرام ته د ازموینې ګډونوال هم دې چارې ته خوښ دي.

د کونړ ولايت اوسېدونکی او د دغې ازموينې يوه ګډونوال سیدالله سباوون پژواک ته وویل، خوښ دی چې د کابل پوهنتون د ماسټرۍ پروګرام کې يې ګډون  کړى دى.

هغه وایي، د سید جمال‌الدین پوهنتون له کمپیوټر ساینس پوهنځي څخه فارغ شوی او د کابل پوهنتون کمپیوټر ساینس پوهنځي ماسټرۍ پروګرام کې د ګډون لپاره يې څلور میاشتې وړاندې نوم‌لیکنه کړې وه.

هغه ټينګار وکړ چې په ازموینه کې شفافیت ته بايد ډېره پاملرنه وشي.

د ازموینې یوه بل ګډون‌وال محمد‌رفیع زېور پژواک ته ورته څرګندونې وکړې.

نوموړي له مسوولینو وغوښتل چې د ازموینې د پایلو په برخه کې روڼتيا ته ډېره پاملرنه وکړي.

د یادونې ده، د لوړو زده‌کړو وزارت عالي شورا درې ورځې وړاندې د هېواد په بېلابېلو تحصيلي بنسټونو کې د لیسانس په کچه لس پوهنځي، د ماسټرۍ ۱۳ او د دوکتورا دوه پروګرامونه نوي ایجاد کړل.

Views: 97

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.