کابل (پژواک، ۱۳ مرغومی ۱۴۰۲): د جاپان چارواکو اعلان کړی چې د دغه هېواد په ایشیکاوای ولایت کې د تېرې دوشنبې زلزلې له امله د مړه شوو کسانو شمېر ۶۲ ته رسېدلی دی.
اسوشیټېډ پرېس د ایشیکاوای ولایت چارواکو په حواله نن راپور ورکړی چې ډېره مرګژوبله د دغه هېواد په واجیما او سوزو ښارونو کې اوښتې ده.
د چارواکو په وینا، د یادې زلزلې له امله څه باندې ۳۰۰ کسان ټپیان شوي دي.
په راپور کې زیاته شوې چې په زلزلهځپلو سیمو کې د پلټنې او ژغورنې عملیات دوام لري.
د جاپان د هواپېژندنې ادارې ویلي، له لومړۍ زلزلې وروسته یې شاوخوا ۱۴۰ نور ټکانونه تشخیص کړي او خبرداری یې ورکړ چې ښایي په راتلونکو ورځو کې تر دې سختې زلزلې وشي.
د ریښتر په کچه ۷.۶ درجې یادې زلزلې په پایله کې چې وړمه ورځ (د مرغومي ۱۱مه) د جاپان شمال لور ته په هوکایدو ټاپو کې وشوه، ډېر شمېر ودانۍ ویجاړې شوې، سړکونه تړل شوي او د زرګونو کورنیو برېښنا پرې شوې ده.
جاپان هغه هېواد دی چې ډېرې زلزلې په کې کېږي او هر کال شاوخوا یو زر او ۵۰۰ د زلزلې ټکانونه په کې رامنځته کېږي.
Views: 8