کابل (پژواک، ۱۷ مرغومی ۱۴۰۲): په افغانستان کې د ملګرو ملتونو مرستندوی دفتر (یوناما) ویلي چې د کابل وروستۍ چاودنې ۲۵ کسانو ته مرګژوبله اړولې ده خو پولیس دغه شمېره شل یادوي.
دا چاودنه پرون له ماښام وروسته شاوخوا ۶:۱۵ بجې د کابل ښار شپږمې امنیتي حوزې اړوند د دشت برچي سیمې په قلعه ناظر کې وشوه.
پرون د کابل امنیې قوماندانۍ ویلي وو چې په دې پېښه کې دوه کسان وژل شوي او ۱۴ نور ټپیان دي خو د امنیې قوماندانۍ ویاند خالد ځدراڼ نن وویل: «دشت برچي کې د سپرلیو په یوه کاسټر موټر کې چاودنې له امله له بدهمرغه پنځه تنه عام هېوادوال شهیدان او ۱۵ تنه نور ټپیان شول.»
نوموړی وايي، د پېښې ټپیان روغتونونو ته وړل شوي او روغتیایي وضعیت یې د ډاډ وړ دی.
خو یوناما ویلي چې په دې چاودنه کې ۲۵ کسانو ته مرګژوبله اوښتې خو د مړو او ټپیانو کره ارقام یې نه دي ورکړي.
یوناما پر ملکي وګړو د بریدونو مخنیوي غوښتنې ترڅنګ ویلي چې د دې ډول بریدونو عامل باید محاکمه شي.
د کابل امنیې قوماندانۍ ویلي چې د پېښې په اړه د پولیسو له لوري لا هم پلټنې روانې دي څو عاملین پیدا او د قانون منګولو ته یې وسپاري.
د رسنیو د راپورونو له مخې، داعش ډلې د دغه برید مسوولیت پر غاړه اخیستی او ادعا یې کړې چې ۲۰ کسان یې وژلي دي.
Views: 23