کابل (پژواک، ۶ کب ۱۴۰۲): د افغانستان لپاره د چین ځانګړی استازی وايي، د امریکا متحده ایالتونه باید د افغانستان د بیارغونې، په بهر کې د افغانستان د شتمنیو ازادولو او پر دغه هېواد د یو اړخیز بندیزونو د لغوه کولو خپل اصلي مسوولیت پر غاړه واخلي.
د افغانستان په چارو کې د چین ځانګړي استازي یوشیایونګ پر اېکسپاڼه د یوه پیغام په خپرولو ویلي، چین او د سیمې هېوادونو د دوحې په غونډه کې له اسلامي امارت سره د خبرو غوښتنه کوله او «د افسوس خبره ده» چې دغه ناسته ناکامه شوه.
هغه څرګنده کړې: «د افغانستان په اړه د دوحې ناسته، هماغه ډول چې د ملګرو ملتونو سرمنشي انتونیو ګوتریش وویل، د اندېښنې ټولې مهمې برخې تر پوښښ لاندې نیسي څو ډاډ ترلاسه شي چې افغانستان د تروریستي فعالیتونو په مرکز نه بدلېږي او دغه هېواد پراخ بنسټونه لري.»
په همدې حال کې، د یوناما مشرې روزا اوتنبایوا د بهرنیو چارو وزارت له سرپرست امیرخان متقي سره لیدنه وویل چې د ځانګړي استازي په ټاکلو کې باید داسې اقدام ونه شي له افغان حکومت سره کار نور هم پېچلی کړي.
له دې مخکې هم د سرپرست حکومت چارواکو ویلي وو چې د نړۍ له لوري د بندیزونو لګول د هیڅ لوري په ګټه نه دي.
دا په داسې حال کې ده چې اسلامي امارت تل ویلي چې د افغانستان خاوره به د هیڅ هېواد پر وړاندې ونه کارول شي.
Views: 22