مزارشریف (پژواک، ۱۹ کب ۱۴۰۲): بلخ کې ورزشي مسوولين وايي چې د افغان او پاکستاني ورزشکارانو په ګډون د«کې ون کېک بوکسېنګ» دويم پړاو سيالۍ د دغه ولايت مرکز مزارشريف ښار کې ترسره شوې.
د بلخ د کېک بوکسېنګ فدراسيون مشر سخي فېروز وايي، دغه سيالۍ د جمعې په شپه د زمري په اتلسمه د درېيو پاکستاني لوبغاړو او د هېواد بېلابېلو ولايتونو د ۲۵ ورزشکارانو په ګډون ترسره شوې.
فېروز وايي، د ورزش وده، ورزش ته د ځوانانو هڅول او د هغوی د مهارتونو لوړول د دغو سیالیو د ترسره کولو له موخو څخه دي.
نوموړي زیاته کړه: «د دغو سیالیو په دویم پړاو کې ۲۸ ورزشکارانو برخه اخیستې چې درې یې له پاکستانه دي او زموږ موخه د دې ورزش ملاتړ، هڅونه او پراختیا ده.»
ورته وخت کې پاکستاني ورزشکارانو چې له افغان ورزشکارانو سره د سیالۍ لپاره بلخ ته راغلي، د دغه ډول سیالیو په ترسره کېدو یې خوښي څرګنده کړه او د افغان لوبغاړو وړتیاوې یې وستایلې.
حياتالله يو له پاکستاني لوبغاړو څخه وايي: «موږ ډېر خوشحاله یو چې په دغو سياليو کې مو ګډون وکړ، افغان لوبغاړي هم ډېر پياوړي دي، موږ د ورزشکارانو ترمنځ لا زياته راشه درشه غواړو.»
په همدې حال کې یو شمېر افغان ورزشکاران وايي چې مهارتونه او وړتیاوې لري او که په نړۍوالو سیالیو کې د ګډون چانس ورکړل شي، کولای شي د افغانستان په نوم ډېر ویاړونه وګټي.
د کېک بوکسېنګ فدراسيون د مسوولينو په وينا، د دغه ټورنمنټ راتلونکي پړاو ته به د قزاقستان، تاجکستان، ازبکستان او ايران په ګډون د بېلابېلو هېوادونو ورزشکاران رابلل کېږي.
Views: 10