زرنج (پژواک، ۱۱ غویی ۱۴۰۳): د نیمروز ځایي سرچینې وایي چې د خیاطانو له لوړو بیو او د دغه ولایت د اوسېدونکو له شکایتونو وروسته، هغوی ته نرخپاڼې برابرې شوي او باید خیاطان د هغو مطابق عمل وکړي، له دې پرته له سرغړونکو سره قانوني چلند کېږي.
د نیمروز د صنعت او سوداګرۍ ریاست د صنعتي پارکونو امر محمداسحاق جویا پژواک خبري اژانس ته وویل: «د خیاطانو له لوړو بیو د خلکو له شکایتونو وروسته، د ولایت مقام یوه کمېټه چې د صنعت او سوداګرۍ ریاست، ښاروالۍ او امنیې قوماندانۍ له ادارو جوړه شوې، ټاکلې او توظیف کړې یې ده څو په عمومي ډول د بازار له قیمتونو نظارت وکړي.»
هغه وایي، دې کمېټې چې کوم نظارت له بازاره درلود څرګنده شوه چې د رخت او د هغه د ګنډلو بیه لوړه ده او خلک د کالیو د ګنډلو وس نه لري.
د هغه په خبره، دغې کمېټې ټولو برخو ته لکه خیاطانو او رخت پلورونکو ته ځانګړې نرخپاڼې ټاکلي او کسبګر مکلف دي چې هغه د دوکان دننه نصب کړي او د هغه مطابق اجرات وکړي.
هغه وویل: «د دې نرخپاڼې له مخې د ساده کالیو ګنډلو بیه ۲۰۰ او ۲۵۰، د اعلی کالیو ګنډلو ۴۰۰، د ماشومانو د کالیو ګنډلو بیه له ۱۲۰ تر ۱۵۰ افغانیو پورې ټاکل شوې ده.»
نوموړی دغهراز وایي چې د دې نرخپاڼې مطابق رخت پلورونکي هم مکلف دي چې په هر متر کې ۱۰ سلنه ګټه واخلي.
د نیمروز د صنعت او سوداګرۍ ریاست د صنعتي پارکونو امر وایي، که له دې نرخپاڼې سرغړونه وشوه نو له سرغړونکو سره به قانوني چلند وشي.
د دغه ولایت ځيني اوسېدونکي د دغو نرخپاڼو د ټاکلو هرکلی کوي او وایي چې مخکې له دې د خیاط چې څنګه به زړه و په همغه ډول یې اجوره اخیسته.
د زرنج ښار یوه اوسېدونکي عزتالله نوروزي پژواک ته وویل چې سږ کال روژې میاشت کې د خیاطانو اجوره لوړه شوې وه.
هغه وویل: «مخکې په ټولو خیاطیو کې د کالیو ګنډلو بیه ارزانه او یو شان وه، خو د روژې په میاشت کې د کالیو ګنډلو بیه درې برابره لوړه شوې وه، تر اوسه بېرته عادي حالت ته نه ده راګرځېدلې، دې شرایطو کې خلک قطعاً د رخت اخیستو او ګنډلو وس نه لري.»
نوموړي د دغو نرخپاڼو توزیع ستایلې او ویې ویل چې مخکې د یوې جوړې کالیو ګنډلو بیه ۲۰۰ افغانۍ وه خو مخکې له اختره دوه درې برابره لوړه شوې وه.
دغهراز د دغه ولایت د کنګ ولسوالۍ یوه اوسېدونکي صدیق د دغه ولایت د مسوولینو له یاد اقدامه هرکلی وکړ او ویې ویل: «یو متر تکه په ۱۰۰ افغانیو اخلم چې څلور متره ۴۰۰ افغانۍ کېږي، خو د ګنډلو بیه یې له ۵۰۰ تر ۶۰۰ افغانیو پورې ده چې موږ غریب خلک یې وس نه لرو.»
دغو دواړو سرچینو هیله وښوده چې دا نرخپاڼې عملي شي.
Views: 12