سمنګان کې لس کلینیکونه، معاینه‌خانې او درملتونونه تړل شوي

اېبک (پژواک، ۱۶ لړم ۱۴۰۳): سمنګان کې روغتیايي مسوولین وايي، له قوانینو د سرغړونې او د فعالیت جوازونو نه درلودو له امله یې د دغه ولایت په دره صوف بالا او پایین ولسوالیو کې لسګونه کلینیکونه، معاینه‌خانې او درملتونونه تړلي دي.

د سمنګان د عامې روغتیا رییس مولوي محب‌الله بهاري پژواک خبري اژانس ته وویل، دغه پلاوي چې د روغتيايي ستونزو د حل په موخه يې د حضرت سلطان او دره صوف بالا او پایین ولسواليو ته سفر کړى و، د روغتيايي خدمتونو د ارزونې ترڅنګ يې له کلينيکونو، معاينه‌خانو او خصوصي او دولتي درملتونونو هم ليدنه کړې ده.

نوموړي زیاته کړه، له قوانینو د سرغړونې او د فعالیت جوازونو نه درلودو له امله په دره صوف بالا او پایین ولسوالیو کې دوه د غاښونو کلینیکونه، درې معاینه‌خانې او ۱۸ درملتونونه تړل شوي دي.

د سمنګان روغتيايي چارواکي په داسې حال کې د بې جوازه کلينيکونو، درملتونونو او معاینه خانو د تړل کېدو خبر ورکوي چې تېر کال د يادو ولسواليو يو شمېر اوسېدونکو شکايت کړى و چې د دوى په سيمو کې درمل په خپل سر پلورل کېږي.