درېیو ولایتونو کې له نږدې پنځه زره کورنیو سره مرسته وشوه

کابل (پژواک، ۱۰ لېندۍ ۱۴۰۳): سيمه‌ییز مسوولین وایي، فراه او غزني کې له څه باندې ۴۴۰۰ کورنیو سره د خوراکي توکو او پنجشیر کې له ۵۰۰ کورنیو سره د ژمنیو توکو مرسته وشوه.

د فراه ولایت د کلیو بیارغونې او پراختیا ریاست په خبرپاڼه کې راغلي چې د دغه ولایت په پرچمن ولسوالۍ کې له درې زره او ۹۶ کورنیو سره د خوراکي توکو مرسته وشوه.

دغه‌راز د غزني ولایت د کلیو بیارغونې او پراختیا رئیس مولوي محمد قاسم امیني پژواک خبري اژانس ته وویل چې د دغه ولایت په اب بند ولسوالۍ کې له ۱۳۸۷ کورنیو سره د خوراکي توکو مرسته وشوه.

یادې مرستې د ملګرو ملتونو د خوړو نړۍوال سازمان په مالي مرسته شوي او هرې کورنۍ ته اوړه، غوړ، دال، مالګه او یوه اندازه د ماشومانو تقویتي خواړه ورکړل شوي دي.

د یوه بل خبر له مخې، د پنجشیر والي ویاند سیف‌الدین لټون وایي، د دغه ولایت مقام له ۵۰۰ اړمنو کورنیو سره د ژمنیو توکو مرسته وکړه.

هغه وویل چې په دغو مرستو کې هرې کورنۍ ته یوه کمپله، له څلورو تر شپږو جمپرونه، لس متره تکه او څلور خولۍ ورکړل شوي دي.