مجاهد: د ا.ا د استازي له ګډون پرته به د م.م د امنیت شورا پرېکړې له واقعیته لرې وي

کابل (پژواک، ۲۲ لېندۍ ۱۴۰۳): د اسلامي امارت ویاند د افغانستان په اړه د ملګرو ملتونو د امنیت شورا ناستې ته په غبرګون کې ویلي چې د دې ناستې پرېکړې به د سرپرست حکومت د استازي له ګډون پرته غیرمنصفانه او له واقعیته لرې وي.

یادې څرګندونې په داسې حال کې مطرح کېږي چې د ملګرو ملتونو امنیت شورا  نن (پنجشنبه، د لېندۍ ۲۲مه) د افغانستان په اړه ناسته جوړوي.

په یاده ناسته کې به د یوناما رییسه روزا اوتونبایوا، د افغانستان د بندیزونو کمېټې رییس په توګه د اکوادور سفیر اندرس مونتالوو سوسا او د ملګرو ملتونو د بشري مرستو همغږي‌کوونکي دفتر یو چارواکی وینا وکړي.

د اسلامي امارت ویاند ذبیح‌الله مجاهد په یوه غږیز پیغام کې د افغانستان په اړه د ملګرو ملتونو د امنیت شورا ناستې په اړه رسنیو ته ویلي چې د سرپرست حکومت د استازي له ګډون پرته د یادې ناستې پرېکړې به عقده‌یي او له واقعیته لرې وي.

مجاهد دغه‌راز ویلي چې د اسلامي امارت د استازي له ګډون پرته د داسې ناستو جوړېدل د وخت ضایع کول دي.

هغه زیاته کړې چې اسلامي امارت ته د ملګرو ملتونو چوکۍ نه ورکول به د ابهامونو د پیدا کېدو لامل شي او د افغانستان د موقف د بیان د مخنیوي سربېره د یاد سازمان پریکړې به د دغه هېواد د خلکو په ګټه نه وي.

مجاهد یو ځل بیا د افغانستان په اړه د بحث څخه مخکې د ملګرو ملتونو د چوکۍ د ورکولو غوښتنه وکړه او ویلي یې دي د یادې چوکۍ په ورکولو به له خپل موقف څخه دفاع وکړي او رامنځته شوي ابهامونه به لرې شي.