د پاکستان له زندانونو ۱۲۲ افغان کډوال ازاد شول

کابل (پژواک، ۲۰ غویی ۱۴۰۴): د کډوالو او راستنېدونکو چارو وزارت وايي چې د پاکستان له زندانونو ۱۲۲ افغان کډوال ازاد او هېواد ته راستانه شول.

یاد وزارت نن (شنبه،۲۰ غویی) پر خپله اېکس‌پاڼه لیکلي چې یاد شمېر افغان کډوال د غويي په ۱۸مه او ۱۹مه د یاد هېواد له زندانونو خوشې او هېواد ته راستانه شوي دي.

سرچینې د کندهار سپین‌بولدک د سرحدي امریت د هرکلي او ثبت کمېټې د معلوماتو پر بنسټ لیکلي: «یاد کسان د پاکستان په بېلابېلو سیمو کې نیول شوي وو او له یوې تر دوو ورځو بندیان وو.»

د سرچینې په حواله، دغه کسان د ثبت او بشري مرستو له ترلاسه کولو وروسته خپلو اصلي سیمو ته لېږل شوې دي.

دا په داسې حال کې ده چې د روانې غويي میاشتې په ۱۵مه هم ۱۰۴ افغان کډوال د پاکستان له زندانونو ازاد او هېواد ته راستانه شوي وو.