ټرمپ: هند او پاکستان پر اوربند هوکړه وکړه

کابل (پژواک، ۲۰ غویی ۱۴۰۴): د امریکا ولسمشر ډونالډ ټرمپ وایي، د دغه هېواد په منځګړیتوب هند او پاکستان پر «یوه بشپړ او سمدستي» اوربند هوکړه وکړه.

هغه پر خپل اېکس‌پاڼه لیکلي: «د امریکا د منځګړیتوب له لارې د یوې اوږدې شپې له خبرو وروسته، خوښ یم چې اعلان وکړم، هند او پاکستان د یو بشپړ او سمدستي اوربند هوکړه کړې ده. دواړو هېوادونو ته د عقلاني فکر او لوړ هوش کارونې مبارکي وایم.»

د روانې غويي مياشتې په دویمه د هند تر ولکې لاندې کشمیر کې وسله‌والو د ګرځندویانو په یوه مشهور ځای «پهلګام» کې پر سیلانیانو بريد وکړ چې لږ تر لږه ۲۶ کسان په‌کې ووژل او ۱۷ نور ټپیان شول.

هند دغه برید په پاکستان پورې تړلی، خو اسلام‌اباد هر ډول لاس لرل په‌کې ردوي.

د تېرې اونۍ د چهارشنبې په شپه هند پر پاکستان بریدونه وکړل، پاکستاني چارواکو وویل چې په دغو بریدونو کې ۲۶ کسان وژل شوي او ۴۶ نور ټپیان دي. هند مخکې ویلي وو چې د پاکستان په ځوابي بریدونو کې ۱۳ ملکي وګړي وژل شوي او ۵۹ نور ټپیان شوي دي.

د راپورونو له مخې، له بریدونو وروسته په پاکستان او هند کې د ځینو هوایي ډګرونو فعالیتونه درېدلي او د پاکستان او شمالي هند پر هوایي حریمونو الوتنې نه کېږي.

د پاکستان پوځ نن تازه ویلي چې د هند د بریدونو په ځواب کې یې په هند کې ځیني پوځي اهداف په نښه کړي چې د پټانکوټ او اودامپور اډې هم په‌کې شاملې دي.

د امریکا د بهرنیو چارو وزیر مارکو روبیو د پاکستان له لوی درستیز جنرال عاصم منیر سره په ټیلېفوني خبرو کې د دغه هېواد او هند ترمنځ د روان کړکېچ او تاوتریخوالي پای ته رسېدو لپاره د منځګړیتوب وړاندیز کړی دی.