معلولین بلخ نظر به توانایی‌های شان در ادارات دولتی استخدام می‌شوند

مزارشریف (پژواک، ۱۲ ثور، ۱۴۰۲): مسؤولین اصلاحات اداری و خدمات ملکی ولایت بلخ می‌گویند که معلولین نظر به توانایی‌های شان در ادارات دولتی گماشته می‌شوند.

مولانا نیک‌محمد حنفی، رئیس اصلاحات اداری و خدمات ملکی بلخ امروز در یک نشست با معلولین این ولایت وعده سپرد که افراد دارای معلولیت را نظر به توانایی‌های شان در ادارت دولتی استخدام می‌نمایند.

موصوف افزود که حکومت سرپرست برای تمام اقشار جامعه ارزش یکسان قایل است و قبلا نیز ادارات دولتی مختلف چون ادارات شهدا و معلولین و سره میاشت این افراد را جذب نموده‌اند.

وی می‌گوید که در حال حاضر روند شناسایی بست‌های خالی ادارات ‌دولتی جریان دارد و بر اساس توانایی و مهارت‌ها آنان را استخدام خواهند کرد.

در همین حال، سیدمحمد یزدان‌پرست به نماینده‌گی از معلولین در حالی که از مشکلات اقتصادی و اجتماعی افراد دارای معلولیت یادآوری نموده از مسؤولین  خواست تا این روند را سرعت بخشیده و عملی سازند.

این اقدام در حالی اتخاذ می‌شود که پیش از این شمار زیادی از معلولین ولایت بلخ از حکومت سرپرست خواسته بودند تا فرصت‌های شغلی برای آنان ایجاد نماید.

قابل یادآوری است که در ولایت بلخ بیش از ۵۰ هزار معلول وجود دارند.