ولسمشر غني: هر ولایت ته دې له اساسي قانون سره سم یو ډول پاملرنه وشي

کابل (پژواک، ۴ زمری ۹۹): ولسمشر غني سپارښتنه وکړه چې له اساسي قانون سره سم دې هر ولایت ته یو ډول پامل نه وشي او په دولت کې مسلکي او وړ کسان د هغو کسانو پر ځای وګومارل شي چې ظرفیت نه لري او کار نه کوي.

د هغې خبرپاڼې له مخې چې نن له ارګه پژواک خبري اژانس رالېږل شوې ده، ولسمشر غني نن له غرمې وروسته د اداري اصلاحاتو خپلواک کمېسیون له رییس نادر نادري و د یاد کمېسیون له کمېشنرانو سره په ارګ کې ولیدل.

د یاد کمېسیون رییس او کمېشنرانو د ګومارنو، ازموینو او د ملکي خدمتونو له ادارو د ارزونې، د بشري قوې وضعیت، تعیینات، څارنه او د ادارو د موخو پلې کولو لپاره د کارکوونکو د سویې ثبت، د دندو د لایحې د کار برخې او د پوهنې او عامې روغتیا وزارتونو په اړه د خپلو ارزونو راپور وړاندې کړ.

خبرپاڼه زیاتوي چې په دې ناسته کې یې د بایومټریک پلي کولو، د خالي بستونو لپاره د وخت د اعلان، د مقررو او لایحو وروستي کولو، د ولایتي ادازو د واک پر ډول، د بشري منابعو پیاوړتیا او د بنسټونو د جوړښت پر تنظیم خبرې وکړې.

ولسمشر د یاد راپور له اورېدو وروسته وویل چې اداري فرهنګ دې رامنځته شي چې خدمت محوره وي او خلکو ته د خدمت لپاره دې وړ کادرونه وګومارل شي چې نظام ته ژمن وي نه زورواکو ته.

غني وویل: "قانون محوره فرهنګ دې وده وکړي او د ادارو کړنې دې قانوني شي."

هغه زیاته کړه چې له ولایتونو سره دې یو ډول چلند ترسره شي او د دولتي ادارو سرچینو وېش دې د یوه ملي لید پر اساس ترسره شي، افغانستان شموله برنامې دې عملي شي او ادارې دې د ملي یووالي تمثیلوونکې وي او په ادارو کې دې بې تفاوتي او بې مسوولیتي له منځه ولاړ شي.

ولسمشر د دې په ویلو سره چې د پوهنې وزارت خالي بستونه دې ټولو ږلایتونو ته په عادلانه ډول ووېشل شي، وویل: "له اساسي قانون سره سم دې ټولو ولایتونو ته یو ډول پام وشي او پوهنې وزارت دې مکتب محوره شي."

ولسمشر څرګنده کړه چې د هېواد محرومو سیمو ته دې پاملرنه وشي او ادارې باید تحرک ولري، د ازموینې ډول باید داسې وي چې دولت ظرفیتونه جذب شي او وړ او لایقه خلک د هغو کسانو پر ځای وکومارل شي چې کار نه کوي او ظرفیت نه لري.