د هرات د والي په ګډون ۲۱ کسان د اداري فساد په تور محکمې ته ورپېژندل شوي

کابل (پژواک، ٥ لړم ٩٩): لویه څارنوالي وايي چې د هرات د والي، ددغه ولایت د عامې روغتیا رییس او د ولایتي شورا درې غړو په ګډون ۲۱ کسان د اداري فساد په تور محکمې ته معرفي شوي دي.

دغه مطلب نن لویې څارنوالي پر خپله فيسبوک پاڼه خپور کړی دی.

لویه څارنوالي وايي، له کرونا ویروس سره د مبارزې د بودیجې په مصرف کې د یادو کسانو د اختلاس او خیانت د قضیې پاڼې د څېړنو تر بشپړېدو وروسته د اداري فساد لویو جرمونو ته د رسېدو لومړنۍ محکمې ته وړاندې کړې دي.

څارنوالي وايي، د هرات والي عبدالوحید قتالي، د عامې روغتیا رییس عبدالحکیم، د ولایتي شورا درې غړي، د تخصیصاتو مامور، د مستوفیت د کنټرول مدیریت کارکوونکی، د معاینې او څارنې د پلاوي په توګه درې ډاکتران، د کرونا سټاک مسوول، د اسیا فارما شرکت استازي او مرستیال، د السید افغان لمتېد شرکت رییس او ددغه ولایت د تسلیمۍ پلاوي او مدیریت د کنټرول او ارزونې پلاوي درې غړي د دې قضیې په شکمنو کسانو کې شامل دي.

د څارنوالۍ په خبره، د یادو کسانو دوسیې د بیاپلټنې ادارې له خوا د ډېرو څېړنو او عدالت د تامین په موخه لویې څارنوالۍ ته سپارل شوې وې.

لویې څارنوالۍ دغه قضیه د اداري فساد له لویو جرمونو سره د مبارزې د ځانګړې څارنوالۍ له لارې تعقیب کړې او د قضیې د مرتکبینو دوسیه د قانونیت د تطبیق او عدالت د تامین لپاره د ۱۳۹۹ کال د لړم په درېیمه نېټه د اداري فساد لویو جرمونو ته د رسېدو لومړنۍ محکمې ته سپارلې ده.

څارنوالۍ زیاته کړې چې ددغې قضیې د موظف څارنوال د صورت دعوی پر بنسټ یاد کسان د کرونا ویروس له ځانګړې شوې بودیجې د شپږ قلمه طبي تجهیزاتو، یوې پایې «سي ټي سکن» او غیر مرتبو او غیرضروري موادو د اخیستو په برخه کې له ۳۴ میلیون څخه د ډېرو افغانۍ اختلاس او غدر تورن شوي دي.

سرچینې زیاته کړې، د قضیې موظف څارنوال د صورت دعوی تر بشپړ څېړلو او ترتیب وروسته د غدر او اختلاس په تور د شکمنو کسانو د اسنادو او مدرکونو پر اساس له محکمې څخه د مجازاتو غوښتنه کړې ده.

د یادونې ده چې له دې مخکې د بیاپلټنې ادارې د هرات، بدخشان، نورستان او میدان وردګو ولایتونو اړوند د کرونا د بودیجې له مصارفو د اداري فساد اړوند څلور قضیې د څېړنو لپاره لویې څارنوالۍ ته لېږلې دي.

څارنوالۍ ویلي، له دې ډلې د هرات او میدان وردګو قضیې بشپړې او محکمې ته لېږل شوې دي، دغه راز د نورستان او بدخشان ولایتونو قضیې د بشپړېدو په حال کې دي او ټاکل شوې د موظفو څارنوالانو تر تصمیم وروسته یې اطلاع رسونه کېږي.

لویې څارنوالۍ خلکو ته ډاډ ورکړی چې ټولو قضیو ته د قانون په رڼا کې د عدالت په مراعاتولو رسېدنه کېږي.

د یادونې ده چې تېره ورځ د کندهار د والي حیات الله حیات په ګډون لس کسان د کرونا په بودیجه کې د اختلاس په تور لویې څارنوالۍ ته ورپېژندل شوي دي.