کابل (پژواک ١٠ کب ٩٤): د چين لوى درستيز وايي، هېواد به يې پر پراختيايي او اقتصادي همکاريو سربېره د افغانستان له حکومت سره په نظامي برخو کې د کابو ٧٢ ميليون امريکايي ډالرو (۴۸۰ ميليون چينايي ين) په ارزښت مرسته وکړي.
نوموړي چې نن د يوه لوړپوړي پلاوي په مشرۍ په رسمي سفر کابل ته راغلى، دغه څرګندونې، له ولسمشر اشرف غني سره په ارګ کې د کتنې پرمهال کړې دي.
دا په داسې حال کې ده، چې تردې وړاندې (د ليندۍ ١٩مه) ولسمشر غني له چين څخه غوښتي و، چې د ترهګرو د ځپلو لپاره له افغان ځواکونو سره مرسته وکړي.
د ولسمشرۍ له مطبوعاتي دفتر څخه پژواک خبري اژانس ته په رالېږل شوې خبرپاڼه کې راغلي، چې ولسمشر محمد اشرف غني نن د چين د ولسي جمهوريت له لوى درستيز جنرال فن فيګوى او ملګري پلاوي سره وکتل.
سرچينه کاږي، په دې کتنه کې د چين د وسله وال پوځ لوى درستيز ولسمشر ته د افغانستان او سيمې په هکله د چين د جمهور رييس د نظرياتو، پلانونو او برنامو په هکله معلومات ورکړل او زياته يې کړه، چې د افغانستان او چين اړيکې دوستانه او په ښو مناسباتو ولاړې دي.
جنرال فن فيګوى ولسمشر غني ته ويلي: "د چين خلک تراوسه هم په نړيوال بانک کې ستاسو د ماموريت پرمهال د چين په بېلابېلو برخو کې د اوبو لګولو د پروژو د تامين او تطبيق يادونه او قدرداني کوي."
د نوموړي په وينا، چين په افغانستان کې د سولې د ټينګښت، د اړيکو د پراختيا او له ترهګرۍ سره د مبارزې په برخو کې د افغانستان د حکومت هڅې او اقدامات ستايي او همدارنګه يې ولسمشر ته د خپل هېواد په استازيتوب د همکاريو ډاډ ورکړ.
د چين لوى درستيز ولسمشر غني ته د چين په استازيتوب، د ده د هغې طرحې د ملاتړ ډاډ ورکړ، چې د شانګهاى په غونډه کې يې له ترهګري سره د مبارزې په خاطر د سيمې د هېوادونو د همکاريو د جلبولو په موخه مطرح کړې وه.
هغه وويل، چين به راتلونکي اوړي د دغې طرحې د تطبيق په موخه د سيمې د هېوادونو د مشرانو غونډه جوړه کړي.
د جنرال فن فيګوي په خبره، د څلور لارې په توګه د افغانستان موقعيت د چين د اقتصادي کمربند لپاره حياتي ارزښت لري، خو ترهګري د چين د دغه اقتصادي کمربند لپاره لوى تهديد دى، نو له دې امله چين د ترهګرۍ پر ضد مبارزه باندې ټينګار کوي.
ده زياته کړه، د ترهګرۍ ضد ګډه مبارزه بايد د افغانستان، تاجکستان، چين او پاکستان هېوادونو د څلور اړخيز چوکاټ له مخې ترسره شي.
نوموړي همدارنګه د دغو څلورو هېوادونو ترمنځ د اطلاعاتو او معلوماتو د شريکولو په همکارۍ هم ټينګار وکړ.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن