مزارشريف (پژواک، ٢٩ وږى ٩٩): په بلخ ولايت کې د پاڅون کوونکو يو مشر هاشم احمدزى له يو شمېر نورو کسانو سره په يوه موټربم بريد کى ټپي شوى دى.
د بلخ د امنيې قوماندانۍ وياند عادل شاه عادل د وږي په ٢٩مه پژواک اژانس ته وويل چې دغه پېښه نن سهار د دهدادي ولسوالۍ په خاصه پز سيمه کې رامنځته شوې ده.
د هغه په خبره، يو کرولا موټر چې له چاودېدونکو توکو ډک و، د هاشم احمدزي د موټرو کاروان يې په نښه کړی دی.
د امنیې قوماندانۍ ویاند زیاتوي چې په دې چاودنه کې د قوماندان هاشم په ګډون ۸ پاڅون کوونکي ټپیان دي او يو کس وژل شوی دی.
د بلخ په ملکي روغتون کې يوې سرچینې پژواک ته تایید کړه چې قوماندان هاشم او د هغه څو ساتونکي په ټپي حالت کې روغتون ته ور وړل شوي دي.
هاشم احمدزی پخوانی جهادي قوماندان دی او له دې مخکې د مزارشریف د لومړۍ حوزې امر هم پاتې شوی دی.
نوموړی له تېرو څو میاشتو راهیسې د بلخ ولایت، بلخ ولسوالۍ مربوطاتو کې د ولسي پاڅون کوونکو مشري کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن