بامیان (پژواک، ۲ وږی ۱۴۰۱): د بامیان یو اوسېدونکی چې هره ورځ د بامیان په بازار کې مزدوري کوي، وايي چې ډېری ورځې یوازې ۵۰ افغانۍ ګټي، خو د خپلو اولادونو راتلونکي لپاره یې د همت ملا تړلې څو هغوی خپلو زدهکړو ته دوام ورکړي.
دغه کس حسین نومېږي، د بامیان ولایت د ورس ولسوالۍ اصلي اوسېدونکی دی چې شپږ کاله مخکې مرکز ته راکډه شوی څو د مزدورۍ له لارې وکولای شي خپل اولادونه ښوونځي ته ولېږي او خپل ژوند تېر کړي.
هغه وویل: «شپږ کاله مخکې د بېوزلۍ او د اولادونو راتلونکې له امله له ورس ولسوالۍ څخه د دغه ولایت مرکز ته را کډه شوم، څو د کار او مزدورۍ له لارې د خپل ژوند اړتیاوې پوره او د اولادونو لپاره د زده کړې زمینه برابره کړم.»
نوموړي وویل، څلور لوڼې او دوه سر او نیم سر زامن لري چې دوه اولادونه یې ښوونځي ته ځي او ټول د ده پر غاړه دي چې ډېرې ورځې سهار تر بېګا هڅه کوي او هیله یې ده څو اولادونه یې روښانه راتلونکی ولري.
۴۵ کلن حسین وايي، له ټولې بېوزلۍ او بېکارۍ سره سره، لاهم هیله لري چې د خپلو اولادونو لپاره د زدهکړې زمینه برابره کړي، شپه او ورځ هڅه او سخت کارونه کوي، خولې تویوي څو د خپل ژوند اړتیاوې پوره او ښوونځي ته یې د اولادونو د تګ پر وړاندې کوم خنډ رامنځته نه شي.
هغه زیاتوي، د یاد ولایت د مرکز اړوند په «زرګران» کلي په یوه کوچني کور کې چې د میاشتې زر افغانۍ کرایه ورکوي، د بېوزلۍ ژوند تېروي او تر اوسه ورسره هېڅ مرستندویه بنسټ مرسته نه ده کړې.
د هغه په باور، په دغه ولایت کې مزدوري او کارګري موسمي ده او یو مزدور باید په پنځو میاشتو (له غبرګولي تر لړم میاشتې) کې خپل یو کلن لګښتونه پوره کړي چې د نوموړي په وینا، د کار او مزدورۍ په ټول موسم کې بېکاره و او حتا د خپلو ورځنیو لګښتونو د پوره کولو توان یې نه درلود، دا خو پرځای پرېږده چې پیسې دې وسپموي او د اولادونو د ښوونځي لګښت دې ورکړي.
هغه له مسوولینو غواړي چې د بېوزلو او اړمنو ستونزو ته رسېدنه وشي.
له بلې خوا، اړوند مسوولین وايي، په دغه ولایت کې د بېوزلۍ کچه تر دې لوړه ده چې د یوه خیریه بنسټ له لوري دې بېکاره خلکو ته د کاري زمینې په برابرولو سره حل شي.
د بامیان ولایت د کار او ټولنیزو چارو رییس مولوي نعمتالله نعماني په دې اړه پژواک ته وویل، حکومت د کاري زمینې برابرول خپل لومړیتوب بولي.
هغه زیاته کړه، د کار او ټولنیزو چارو وزارت، د کاري فرصتونو د برابرولو په موخه د سیمې او نړۍ له هېوادونو سره په اړیکه کې دی او هڅه کوي چې هم په داخل کې او له هېواده بهر خلکو ته د کار زمینه برابره کړي.
Views: 26
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن