اټلانټا (پژواک، ۱۷ تله ۱۴۰۱): د امریکا سيانان ټلویزیون خبر ورکړی چې په کابل کې د القاعدې د مشر تر وژل کېدو وروسته په لومړي ځل، په لوړه کچه د امریکا او د افغانستان سرپرست حکومت ترمنځ په قطر کې ناسته شوې ده.
امريکا د روان کال په جولای مياشت کې وويل چې د القاعدې مشر ایمن الظواهري د دغه هېواد د بېپیلوټه الوتکې د برید پرمهال په کابل کې وژل شوی، خو د افغانستان سرپرست حکومت تر اوسه د هغه وژنه نه ده تایید کړې.
تر یاد برید وروسته، د افغانستان سرپرست حکومت او امریکا یو بل د دوحې تړون پر نقض کولو تورنوي.
د امریکا سيانان ټلویزیون د تلې په ۱۷مه، د ځینو باوري حکومتي سرچینو په حواله خبر ورکړی چې سپینې ماڼۍ په دې ناسته کې د ګډون په موخه د استخباراتي ادارې (سيایاې) مرستیال او د بهرنیو چارو وزارت د چارواکو په ګډون یو پلاوی لېږلی دی.
Top US officials hold first in-person meeting with the Taliban since the US killed al Qaeda's leader in July, sources say https://t.co/zsX1FWftri
— CNN (@CNN) October 8, 2022
په راپور کې راغلي چې دغهراز د کابل په پلاوي کې د نورو کسانو ترڅنګ د سرپرست حکومت د استخباراتو رییس عبدالحق وثیق هم شامل دی.
سرچینې زیاته کړې چې په دې لیدنه کې افغانستان لپاره د امریکا ځانګړي استازي ټام ویسټ هم ګډون درلود.
په راپور کې راغلي چې له تېر یوه کال راهیسې د امریکا او سرپرست حکومت ترمنځ ناستې شوې وې، خو د الظواهري تر وژل کېدو وروسته دا لړۍ درېدلې وه.
خو کله چې څو ورځې مخکې امریکا افغان سوداګر بشر نورزی خوشی کړ او د افغانستان سرپرست حکومت یې په بدل کې امریکایي وګړی خوشی کړ، د دواړو لورو ترمنځ اړیکې ښې شوې.
د افغانستان د بهرنیو چارو سرپرست وزیر مولوي امیرخان متقي د یاد سوداګر د خوشي کېدو په مراسمو کې وویل چې د دواړو هېوادونو ترمنځ د اړیکو نوې دروازه پرانیستل شوه.
د سيانان په راپور کې راغلي چې د قطر په یاده ناسته کې د امریکا استخباراتي ادارې (سيایاې) مرستیال ډېوېډ کوهین د عبدالحق وثیق په مشرۍ د کابل پلاوي سره د ترهګرۍ پر ضد مبارزې په تړاو خبرې کړې دي.
تر اوسه د امریکا او د افغانستان سرپرست حکومت په رسمي توګه د دې ناستې په اړه څه نه دي ویلي.
Views: 416