ترینکوټ (پژواک، ۵ مرغومی ۱۴۰۲): د اروزګان ځایي مسوولین وایي، چې د دغه ولایت په ګېزاب ولسوالۍ کې د دوو قومونو ترمنځ د ځمکې د ملکیت پر سر رامنځته شوې دېرش کلنه دعوه په سولهییز ډول هواره شوه.
د ګېزاب ولسوال میرحمزه حنفي پژواک خبري اژانس ته وویل چې دغه دعوه د دې ولسوالۍ په کنځیر سیمه کې د پښتنو او هزارهګانو ترمنځ د ځمکې پر سر ۳۰ کاله مخکې راولاړه شوې وه.
هغه وویل چې یاده دعوه د سیمهییزو مسوولینو او ځایي اوسېدونکو په منځګړیتوب د یوې ناستې په ترڅ کې هواره شوه.
هغه د جزئیاتو له ورکولو پرته زیاته کړه: «په دې سیمه کې ۲۰۰ جریب ځمکه وه چې دواړه قومونو پرې دعوه درلوده، خو له پرېکړې وروسته د هزاره اوسېدونکو ملکیت تثبیت شو او هزاره اوسېدونکي به د یادې دوه سوه جریب ځمکې خپلولو بدل کې پښتنو اوسېدونکو ته ۳۰ میلیون افغانۍ ورکوي.»
د هغه په خبره، له دې فیصلې ورورسته به د دواړو قومونو خلک د دوستۍ په فضا کې ژوند کوي.
د یادې سیمې یو اوسېدونکی علي رضا وایي، ۳۰ کاله کېږي چې په دې سیمه کې د دوی او پښتنو ترمنځ د ځمکې پر سر لانجه وه.
هغه وایي، خوښ دی چې دغه ستونزه په سولهییزه توګه حل شوه.
Views: 32