فراه ښار (پژواک، ۱۶ چنګاښ ۱۴۰۳): د فراه امنیه قومانداني وايي چې په تېرو درېیو میاشتو کې په دغه ولایت کې د نشهيي توکو د تولید او پروسس ۷۲ کارخونې له منځه وړل شوې دي.
دغه څرګندونې د فراه امنیې قوماندانۍ ویاند مولوي محمدنسیم بدري نن د یوې خبري غونډې پر مهال وکړې.
هغه وویل چې په تېرو درېیو میاشتو کې د دغه ولایت امنیتي ځواکونو د نشهيي توکو د کښت، قاچاق او تولید پر وړاندې جدي مبارزه کړې ده.
ده زیاته کړه چې په دغه موده کې ۷۲ د نشهيي توکو د تولید او پروسس کارخونې او زرګونه کیلوګرامه بېلابېل ډوله نشهيي توکي له منځه وړل شوي دي.
د نوموړي د معلوماتو له مخې، په همدې موده کې ۴۸۰ جریب د نشهيي توکو کښتونه له منځه وړل شوي او د پنځه سوو معتادینو درملنه هم شوې ده.
د بدري په وینا، په تېرو درېیو میاشتو کې ۲۴۸ کسان د بېلابېلو جرمونو په تړاو نیول شوي او ترڅنګ یې یو شمېر غیرقانوني وسلې هم له خلکو راټولې شوې دي.
Views: 10