کلات (پژواک ٢٥ لړم ٩٠): د زابل ولایت امنیتي چارواکي وايي، چې د سړک غاړې د ماين په چاودنه کې یو ملکي وګړی وژل شوی او څلور نور ټپي شوي دي.
د دغه ولایت د والي مرستیال محمدجان رسولیار د لړم په ۲۵مه پژواک خبري اژانس ته وویل، چې دغه چاودنه تېره ورځ مازدیګر ۴ بجې رامنځته شوه.
د ده په خبره، یو ټونس موټر، چې له کلات ښار څخه شاه جوى ولسوالۍ ته پر لاره و، د نورک په سیمه کې د کابل- کندهار پر لویه لار د سړک غاړې پر خښ شوي ماین وبرابر شو.
نوموړي زیاته کړه، چې په چاودنه کې یو تن وژل شوی او څلور نور، چې ډېری ماشومان دي، ټپيان شوي دي.
رسولیار وايي، چې د پېښې قربانیان د پولیسو له لوري د کلات روغتون ته لېږدول شوي او یو شمېر نور چې سخت ټپيان و، کندهار ته وړل شوي دي.
هغه د پېښې پړه د دولت پر وسلوالو مخالفینو واچوله او زیاتوي، چې د ماین چاودنو په ډېرى پېښو کې ملکي وګړو ته زیان اوړي.
د پېښي یوه عیني شاهد او د نورک د پوستې پولیس علاوالدین پژواک اژانس ته د ټيلېفون پر کرښه وویل، چې په چاودنه کې موټر ویجاړ شوى دى.
نوموړی وویل، چې له پېښې وروسته دوى قربانیان د نورک سیمه ییز روغتون ته ورسول او وورسته بیا کلات ښار ته ولېږدول شول.
وسلوالو طالبانو تر اوسه په دې اړه څه نه دي ويلي.
Views: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن