کلات (پژواک ١٨ مرغومى ٩٠): په زابل ولایت کې د ملي اردو یوه سرتېري پر بهرنیو پوځیانو ډزې کړي او دوه امریکايي عسکر يې ټپيان کړي دي.
په زابل کې د ۲۰۵ اتل قول اردو د دوهمې پلې لوا ویاند پامیري د مرغومي په ۱۸مه، پژواک خبري اژانس ته وویل، چې دغه پېښه نن (د مرغومي ١٨مه) مازیګر ناوخته رامنځ ته شوې ده.
د ده په خبره، د ملي اردو یوه سرتېري د دوهمې لوا له ګارنیزیون سره د لوبو په لوبغالي کې پر بهرنیو سرتېرو ډزې وکړې، چې له امله یې دوه سرتېري ټپیان کړل.
نوموړي زیاته کړه، چې د ایساف ځواکونو په ځوابي ډزو کې برید کوونکی وواژه.
پاميري وايي، چې ممکن برید کوونکي له وسله والو مخالفینو سره اړیکې درلودې؛ خو د پېښي په اړه پلټنې روانې دي.
په کابل کې د ایساف ځواکونو مطبوعاتي دفتر هم پېښه منلې ده.
د دغو ځواکونو له لوري پژواک اژانس ته وویل شول، چې دوى هم د هېواد په سوېل کې د یوې ورته پېښې په اړه معلومات ترلاسه کړي دي؛ خو د مرګ ژوبلې په اړه یې څه ونه ویل.
سرچینې زیاته کړه، چې د پېښې په اړه پلټنې روانې دي او نور جزئیات به وروسته له رسنیو سره شریک کړي.
دې ته ورته پېښې تر دې وړاندې هم د هېواد په بېلابېلو ولایتونو کې رامنځ ته شوې وې؛ خو په زابل کې دا لومړی ځل دی، چې یو افغان سرتېری پر بهرنیو سرتېرو ډزې کوي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن