هرات ښار (پژواک ٣١ ورى ٩١): د هرات د ملي امنيت موظفينو د تښتوونکو يوه ډله د يوه سوداګر له تښتولو مخکې ونيوله.
د هرات د والي وياند محى الدين نوري، دغه مطلب نن (د وري ٣١مه) د يوې خبري غونډې په ترڅ کې په ډاګه کړ او زياته يې کړه، چې له دې کسانو نه اسناد او شواهد هم ترلاسه شوي دي.
نوموړي د دې کسانو د نيول کېدو نېټه او د ياد شوي سوداګر نوم په ډاګه نه کړ او زياته يې کړه، چې دغه کسان په هرات کې د ملي امنيت د موظفينو له خوا تر تښتونې مخکې نيول شوي او په خپل جرم يې اعتراف کړى دى.
له بلې خوا د هرات د ملي امنيت رياست په خبرپاڼه کې، چې نن پژواک خبري اژانس ته رارسېدلې ده، راغلي چې د ماين پاکۍ د موسسې يو موټرچلوونکى او درې کارکوونکي له تښتوونکو راخوشې شول.
په خبرپاڼه کې راغلي دي، دغه موټرچلوونکى د شينډنډ ولسوالۍ د خلکو په همکارۍ راخوشې شوى دى؛ خو د هغه د خوشې کېدو نېټه يې په ډاګه نه کړه.
همدارنګه د سرچينې د معلوماتو له مخې، د ماين پاکۍ موسسې درې کارکوونکي، چې دوه اونۍ د هرات ولايت له غوريان ولسوالۍ نه تښتول شوي وو، هم راخوشې شول.
په خبرپاڼه کې راغلي، چې دغه کارکوونکي د سيمې د مشرانو او سپين ږيرو په همکارۍ له تښتوونکو خوشې شوي او په تړاو يې څوک نيول شوي نه دي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن